தஞ்சாவூர்: கும்பகோணம் மகாமக குளத்தில் வரும் பிப். 17ம் தேதி மாசிமக தீர்த்தவாரி நடைபெறவுள்ளது. இதற்காக சிவாலயங்களில் வரும் 8ம் தேதியும், வைணத் தலங்களில் 9ம் தேதியும் பத்து நாள் பிரமோற்சவம் கொடியேற்றத்துடன் துவங்க உள்ளது.  

ஒவ்வொரு ஆண்டும் மாசி மாதம் மக நட்சத்திரத்தன்று மாசிமக விழா கொண்டாடப்படுவது வழக்கம். இவ்விழா 12 ஆண்டுகளுக்கு ஒருமுறை மகாமக விழாவாக கொண்டாடப்படுகிறது.
ஆண்டுதோறும் மாசிமக விழாவில் சிவாலயங்கள் மற்றும் வைணவத் தலங்களில் கொடியேற்றி பத்துநாள் உற்சவம் நடைபெறும். இந்தாண்டு, மகாமகம் தொடர்புடைய ஆதிகும்பேஸ்வரர், காசிவி்ஸ்வநாதர், காளகஸ்தீஸ்வரர்,  சோமேஸ்வரர், அபிமுகேஸ்வரர் கோவில் உள்ளிட்ட சிவாலங்களில் வரும் 8ம் தேதி கொடியேற்றத்துடன் விழா துவங்குகிறது.

இதில் ஆதிகும்பேஸ்வரர் கோவிலில் 11ம் தேதி அறுபத்து மூவர் வீதிவுலாவும், 12ம் தேதி ஓலைச்சப்பரமும், 15ம் தேதி தேரோட்டமும்,  17ம் தேதி மகாமக குளத்தில் காலை 12 மணி முதல் 1 மணிக்குள் தீர்த்தவாரியும் நடைபெறவுள்ளது. அதே போல் அபிமுகேஸ்வரர், காசிவிஸ்வநாதர், கவுதமேஸ்வரர் கோவில் சார்பில், 16ம் தேதி மாலை மகாமக குளக்கரையில் தேரோட்டம் நடைபெறவுள்ளது.

வைணவத் தலங்கள்: மாசி மகத்தை முன்னி்ட்டு வைணவத் தலங்களில் முதன்மையானதாக விளங்கும் சக்கரபாணி, ராஜகோபாலசுவாமி, ஆதிவராக பெருமாள் கோவில்களில் வரும் 9ம் தேதி பத்து நாள் உற்சவம் கொடியேற்றத்துடன் துவங்குகிறது. தொடர்ந்து 12ம் தேதி கருட வாகனத்தில் ஓலைச்சப்பரமும், 17ம் தேதி காலை 7 மணிக்கு சக்கரபாணி கோவிலில் தேரோட்டம் நடைபெறவுள்ளது. பின்னர் 12 மணியளவில் காவிரி ஆற்றில் சக்கரப் படித்துறையில் வைணவக் கோயில்கள் சார்பில் தீர்த்தவாரி நடைபெறவுள்ளது. மாசிமகத்தையொட்டி சாரங்கபாணி கோயிலில் வரும் 17ம் தேதி காலை, இரவு நேரங்களில் தெப்ப உற்சவமும் நடைபெறவுள்ளது. மாசிமக விழாவுக்கான ஏற்பாடுகளை அந்தந்த கோவில் நிர்வாகத்தினர், மண்டகபடிதாரர்களுடன் இணைந்து செய்து வருகின்றனர்.