குன்னூர்: குன்னூரில் ஆண்டுக்கு ஒருமுறை மட்டும் திறக்கப்படும் சுயம்பு மகாலிங்கேஸ்வரர் கோவில் நடை திறக்கப்பட்டு அபிஷேகம் மற்றும் வழிபாடுகள் நடத்தப்பட்டன.

நீலகிரி மாவட்டம் குன்னூர் அருகே முடியக்கி என அழைக்கப்படும், ஆழ்வார்பேட்டையில் படுகர் இன மக்களின் பூர்வீக கோவிலான மகாலிங்கேஸ்வரர் கோவில் உள்ளது. சுயம்பு லிங்கமாக எழுந்தருளியுள்ள, மகாலிங்கேஸ்வரர் கோவிலில் ஆண்டுதோறும் ஜூன் மாதம் முதல் திங்கள் அன்று மட்டும் நடை திறந்து, அபிஷேகம் ஆராதனைகள் நடத்தப்படுகின்றன.
இந்த ஆண்டுக்கான விழா இன்று காலை 7:30 மணிக்கு துவங்கி, 1:30 மணிக்கு நிறைவு பெற்றது. இதில் அம்மனுக்கு சிறப்பு பூஜைகள் வழிபாடுகள் நடத்தினர். பிரசாத விநியோகம் நடந்தது.

பக்தர்கள் கூறுகையில், கோடமலை கிராமத்தில் முதல் கன்று ஈன்ற மாட்டின் பாலை பச்சை மூங்கிலில் சேகரித்து அதை கொண்டு மகாலிங்கேஸ்வரருக்கு அபிஷேகம் செய்யப்படும். இந்த மாட்டின் பாலில் தயாரித்த நெய் மட்டுமே கோவில் விளக்குக்கு பயன்படுத்தப்படுகிறது. இவ்வாறு வைக்கப்படும் விளக்கு அணையும் வரை மட்டுமே பக்தர்கள் கோவிலுக்குள் அனுமதிக்கப்படுகின்றனர். இந்த கோவில் திருவிழாவை தொடர்ந்து மற்ற கிராமங்களில் தெவ்வப்பா திருவிழா கோலாகலமாகக் கொண்டாடப்படும், என்றனர்.