மதுரை: விநாயகர் சதுர்த்தியையொட்டி, மதுரை சிறையில் 500க்கும் மேற்பட்ட விநாயகர் சிலைகளை கைதிகள் தயாரித்துள்ளனர். இதை பொதுமக்களுக்கு குறைந்த விலையில் விற்க முடிவு செய்யப்பட்டுள்ளது.

இச்சிறையில் 1850 கைதிகள் உள்ளனர். தண்டனை கைதிகளுக்கு மருத்துவ பேண்டேஜ், ஆபீஸ் கவர் தயாரிப்பு உள்ளிட்ட பல்வேறு தொழில்கள் கற்றுத்தரப்படுகின்றன. இதன்மூலம் கைதிகளுக்கு வருமானம் கிடைத்து வருகிறது. இந்நிலையில் விநாயகர் சதுர்த்தியை முன்னிட்டு 1 அடி, ஒன்றரை அடி உயரத்தில் களிமண் விநாயகர் சிலைகளை கைதிகள் தயாரித்து வருகின்றனர். உதவி சிறை அலுவலர் பழனி கூறியதாவது:டி.ஐ.ஜி., பழனி, கண்காணிப்பாளர் வசந்தகண்ணன் ஊக்குவிப்பால் கைதிகளுக்கு பல்வேறு தொழில்கள் புதிதாக கற்றுத்தரப்படுகின்றன. அதில் ஒன்று தான் சிலை தயாரிப்பு. இதுவரை 500க்கும் மேற்பட்ட சிலைகளை தயாரித்துள்ளனர். இதற்கான களிமண், பெட்ரோல் பங்க்கிற்காக தோண்டப்பட்ட பள்ளத்தில் இருந்து எடுக்கப் பட்டது.இந்தியாவிலேயே மதுரை சிறையில் மட்டும்தான் முதன்முதலாக விநாயகர் சிலைகள் தயாரிக்கப்படுகின்றன. விரைவில் மக்களுக்கு குறைந்த விலையில் விற்க உள்ளோம்.இவ்வாறு அவர் கூறினார்.