பல்லடம்: பல்லடம் அருகே, குபேர கணபதி கோவில் கும்பாபிஷேக விழா நடந்தது. பல்லடம் அடுத்த, கே.கிருஷ்ணாபுரம் கிராமத்தில், குபேர கணபதி, பட்டத்தரசி அம்மன், கன்னிமார் மற்றும் கருப்பராய சுவாமி கோவில்கள் உள்ளன. கோவில் கும்பாபிஷேகம் நேற்று நடந்தது. முன்னதாக, கணபதி ஹோமத்துடன் கும்பாபிஷேக விழா துவங்கியது. கோபுர கலசம் நிறுவுதல், வாஸ்து சாந்தி, மற்றும் இரண்டு கால வேள்வி பூஜைகள் நடந்தன. தொடர்ந்து, விநாயகர் கோவிலில் இருந்து முளைப்பாளிகை ஊர்வலம் நடந்தது. மாணாசிபாளையம் பட்டத்தரசி அம்மன் கோவிலில் இருந்து சீர்வரிசைகள் எடுத்து வரப்பட்டன. நேற்று காலை, 8 மணிக்கு கோபுர கலசங்களுக்கு புனித நீர் ஊற்றப்பட்டு மகா கும்பாபிஷேகம் நடந்தது. தொடர்ந்து, குபேர கணபதி, பட்டத்தரசி அம்மன், கன்னிமார் கருப்பராய‌ சுவாமிக்கு மகா அபிஷேகம், மற்றும் அலங்காரம் உள்ளிட்டவை நடந்தது. பங்கேற்ற பக்தர்கள் அனைவருக்கும் விழா கமிட்டி சார்பில் அன்னதானம் வழங்கப்பட்டது.