திருமங்கலம்: திருமங்கலம் டி.புதுப்பட்டியில் ஸ்ரீ தேவி பூமிதேவி அலமேலுமங்கா சமேத வெங்கடேச பெருமாள் கோவில் கும்பாபிஷேகம் நடந்தது. மேலும் விநாயகர், காளமேகப் பெருமாள், முனியாண்டி சுவாமி, கருப்பணசாமி பீடம், காளியம்மன், முத்தாலம்மன், அய்யனார், பாலமுருகன் கோவில் கும்பாபிஷேகம் நடத்தப்பட்டது.

செப். 7 மாலை முதல் கால யாகசாலை பூஜைகளுடன் கும்பாபிஷேகம் பணிகள் தொடங்கியது. செப். 8 இரண்டாம் கால யாக பூஜைகளில் சுப்ரபாதம் திவ்ய பிரபந்தம் பூஜைகள் செய்யப்பட்டன மாலை மூன்றாம் காலயாக பூஜைகளும், நேற்று காலை நான்காம் கால யாக பூஜைகள் செய்யப்பட்டன. இதையடுத்து 8.20 மணிக்கு ஸ்ரீ தேவி பூமிதேவி அலமேலு மங்கா சமேத வெங்கடேச பெருமாள் கோவிலில் கோபுரத்திற்கு புனித நீர் ஊற்றப்பட்டு கும்பாபிஷேகம் நடத்தப்பட்டது. இதையடுத்து பரிவார தெய்வங்களுக்கு புனித நீர் ஊற்றப்பட்டு கும்பாபிஷேகம் நடந்தது. சுவாமிகளுக்கு சிறப்பு அபிஷேகம் மற்றும் அலங்காரம் செய்யப்பட்டு தீபாராதனை காட்டப்பட்டது. அன்னதானம் வழங்கப்பட்டது. ஸ்ரீவில்லிபுத்தூர் ஆண்டாள் திருக்கோவில் பிரதான அர்ச்சகர் ஸ்ரீவாரி பிரபு வெங்கட்ராம பட்டர் தலைமையிலான குழுவினர் கும்பாபிஷேக பணிகளை செய்தனர்.