அருப்புக்கோட்டை: திருச்சுழி அருகே 11ம் நூற்றாண்டை சேர்ந்த பாண்டியர் கால கல்வெட்டு கண்டுபிடிக்கப்பட்டது.

திருச்சுழி அருகே மூலக்கரைப்பட்டி கிராமத்தில் கண்மாய் கரையின் ஓரமாக கல்வெட்டு ஒன்று கண்டறியப்பட்டது. இது குறித்து அருப்புக்கோட்டை எஸ்.பி. கே., கல்லூரி வரலாற்றுத் துறை பேராசிரியர்  விஜயராகவன், தொல்லியல் மாணவர் ராஜபாண்டி ஆகியோர் கள ஆய்வு செய்தனர்.

இதுகுறித்து அவர்கள் கூறியதாவது, "கிராமத்தின் கண்மாய் கரையின் ஓரமாக 4 அடி உயரமும், ஒன்றரை அடி அகலமும் கொண்ட ஒரு கல்லின் மேற்புறம் 13 வரிகள், வலது புறம் 7 வரிகள் என இரு  பக்கங்களிலும் எழுத்துக்கள் தென்பட்டன. இதனை ஓய்வு பெற்ற தொல்லியல் இயக்குனரும், பாண்டிய நாட்டு வரலாற்று ஆய்வு மைய செயலருமான சாந்தலிங்கம் உதவியோடு படிக்கப்பட்டது.  கல்வெட்டின் எழுத்தமைதியை கொண்டு கல்வெட்டு 10 அல்லது 11 ம் நூற்றாண்டில் ஆட்சி செய்த பாண்டியர்கள் காலத்தினை சேர்ந்தது என கருதப்படுகிறது. கல்வெட்டு உள்ள கண்மாய் கரையானது  மழைக்காலங்களில் நீர்வரத்து அதிகரிக்கும் போது உடைப்பு ஏர்போர்ட் உள்ளது. இதனை இப்பகுதியைச் சேர்ந்த வணிகரான பெற்றான் கழியன் என்பவர் சீர் செய்து கொடுத்துள்ளார். பின்னர் மீண்டும்  உடைப்பு ஏற்பட்டுள்ளது. அப்போது வணிகரின் மகளான கோதிலால் நங்கை என்பவள் கற்களைக் கொண்டு உடைப்பு ஏற்பட்ட கரையினை சரி செய்து உள்ளார். அதற்காக இந்த கல்வெட்டினை  ஏற்படுத்தினார் என கூறுகிறது. நீரின் முக்கியத்துவத்தை அறிந்த இப்ப பகுதியைச் சேர்ந்த வணிகர்களும் நீர் நிலைகளை பேணிப் பாதுகாத்துள்ளனர் என்பதை கல்வெட்டு மூலம் அறிய முடிகிறது.