திருக்கோஷ்டியூர்: திருப்புத்தூர் அருகே பட்டமங்கலம் மீனாட்சி சுந்தரேஸ்வரர், தட்சிணாமூர்த்தி கோயிலில் குருப்பெயர்ச்சியை முன்னிட்டு ராஜகோபுரத்திற்கும், மூலவர், உற்ஸவருக்கும்  இன்று இரவு சிறப்பு தீபாராதனை நடைபெறுகிறது.

சிவகங்கை மாவட்டத்தில் குருதலமாக பட்டமங்கலம் அஷ்டமாசித்தி தட்சிணாமூர்த்தி கோயில் அமைத்துள்ளது. இக்கோயிலில் மும்மூர்த்திகளின் ஸ்வரூபாக குருபகவான் கிழக்கு நோக்கி எழுந்தருளி அருள்பாலிக்கிறார். இன்று குரு  இரவு 11.29 மணிக்கு மீனராசியிலிருந்து மேஷ ராசிக்கு பெயர்கிறார். குருப்பெயர்ச்சியை முன்னிட்டு கடந்த ஏப்.16 ல் சிறப்பு ேஹாமம் நடந்தது. இன்று காலை 6:00 மணிக்கு கோயில் நடை திறக்கப்பட்டு மூலவருக்கு அபிஷேகம் நடந்து வெள்ளி அங்கி அணிந்து சந்தனக்காப்பு அலங்காரத்தில் அருள்பாலிக்கிறார். தொடர்ந்து கால சந்தி, உச்சிக்கால, சாயரட்சை பூஜைகள் நடைபெறும். தல விருட்சமான ஆலமரத்தடியில் உற்ஸவர் எழுந்தருளி முனிவர்கள் தனந்தகுமாரர், தனநந்தர், தனாதனர், சனகர் ஆகியோருக்கு கார்த்திகை பெண்கள் முன்னிலையில் மந்திரம் உபதேசிக்கும் அலங்காரத்தில் பக்தர்களுக்கு  தரிசனம் தருகிறார். குருப்பெயர்ச்சியாகும் இரவு 11:29 மணிக்கு ராஜகோபுரம், மூலவர் கோபுரம், உற்ஸவருக்கு 7 முக தீபராதனையும், மூலவருக்கு நட்சத்திர தீபாரதனையும் நடைபெறும். தொடர்ந்து பக்தர்களின் சாமி தரிசனம் தொடரும். ஏற்பாட்டினை பரம்பரை அறங்காவலர் அ.வீர.அ.வீரப்பச்செட்டியார் செய்கிறார்.