டேராடூன்: கேதார்நாத்தில் மீண்டும் கடும் பனிப்பொழிவு இருப்பதால், யாத்திரை வரும் பக்தர்கள், வானிலை நிலவரத்தை அறிந்து அதற்கேற்ப யாத்திரையை திட்டமிடுமாறு மாவட்ட நிர்வாகம் எச்சரிக்கை விடுத்துள்ளது.

உத்தரகண்ட் மாநிலத்தின் ருத்ரபிரயாக் மாவட்டத்தில் பிரபல கேதார்நாத் புனித தலம் அமைந்துள்ளது. இந்த சிவன் கோவிலுக்கு புனித யாத்திரை துவங்கி நடைபெற்று வந்த நிலையில், மோசமான வானிலை காரணமாக மே 15 வரை, பக்தர்கள் கோவிலுக்கு வருவதற்கான முன்பதிவு தற்காலிகமாக நிறுத்தி வைக்கப்பட்டிருந்தது. இந்நிலையில் சமோலி மற்றும் ருத்ரபிரயாக் மாவட்டங்களில், மீண்டும் கடும் பனிப்பொழிவு இருப்பதால், கேதார்நாத் கோவிலுக்கு வரும் பக்தர்களுக்கு, ருத்ரபிரயாக் மாவட்ட நிர்வாகம் சில அறிவுறுத்தல்களை வழங்கியுள்ளது. இது தொடர்பாக ருத்ரபிரயாக் எஸ்.பி., விஷாகா அசோக் பதானே நேற்று கூறியதாவது: கேதார்நாத்தில் நேற்று மீண்டும் கடும் பனிப்பொழிவு இருக்கிறது. எனவே கோவிலுக்கு வரும் பக்தர்கள் வானிலை நிலவரத்தை அறிந்து தங்கள் பயணத்தை திட்டமிடுமாறு கேட்டுக்கொள்கிறோம். பக்தர்களின் பாதுகாப்பே எங்களுக்கு முக்கியமானது. இவ்வாறு அவர் தெரிவித்தார். இதேபோல் சமோலி மாவட்டத்தில் உள்ள சீக்கியர்களின் புனித தலமான ஹேம்குந்த் சாஹிப்புக்கு யாத்திரை செல்வது கடந்த 2ல் துவங்கியது. இங்கும் பனிப்பொழிவு இருப்பதால், பக்தர்களின் வசதிக்காக பனிக்கட்டிகளை அகற்றும் பணி நடைபெற்று வருகிறது.