ப.வேலுார்: ப.வேலுார் மீனாட்சியம்மை தாயார் உடனுறை சொக்கநாத பெருமானுக்கு, திருக்கல்யாணம் கோலாகலமாக நடந்தது.

ப.வேலுார் மாணிக்கவாசகர் திருமண மண்டபத்தில், மீனாட்சியம்மை உடனுறை, சொக்கநாத பெருமானுக்கு, நேற்று மதியம், 1:00 மணிக்கு திருக்கல்யாணம் மற்றும் 63 நாயன்மார்கள் ஆராதனை விழா நடந்தது. திருக்கல்யாணத்தை முன்னிட்டு, 12 காலை, 5:00 மணிக்கு விநாயகர் வழிபாடு, திருவிளக்கு ஏற்றுதல் நிகழ்ச்சியுடன் திருமண விழா தொடங்கியது.

நேற்று முன்தினம் காலை, திருப்பள்ளி எழுச்சி தீபாராதனையும், திருவாசகம் முற்றோதல் நிகழ்ச்சி நடந்தது. தொடர்ந்து, மாலை பெண் அழைப்பு நிகழ்ச்சியில், மீனாட்சி அம்மை தாயாரை, ப.வேலுார் அக்ரஹாரத்தில் உள்ள லட்சுமி நாராயண பெருமாள் ஆலயத்திலிருந்து நாதஸ்வரம் முழங்க மாணிக்கவாசகர் திருமண மண்டபத்திற்கு பெண் அழைப்பு நிகழ்ச்சி நடந்தது. இதில் ஏராளமான பொதுமக்கள் சீர்வரிசை தட்டுடன் கலந்து கொண்டனர். முக்கிய நிகழ்ச்சியாக, நேற்று மதியம், 1:00 மணிக்கு மீனாட்சி அம்மை உடனுறை சொக்கநாத பெருமானுக்கு திருக்கல்யாணம் நடந்தது. இதில் திரளான பக்தர்கள் கலந்து கொண்டனர்.