கோவை; கோனியம்மன் கோவிலில், உண்டியல் உடைத்து கொள்ளையடித்த மர்ம நபரை, போலீசார் தேடி வருகின்றனர்.

கோவையின் காவல் தெய்வமான கோனியம்மன் கோவிலில், நேற்று, ஆதி கோனியம்மன் சன்னதி உண்டியல் உடைக்கப்பட்டு இருந்ததை கண்டு, காவலாளி அதிர்ச்சியடைந்தார். கோவில் நிர்வாகத்தினர், உக்கடம் போலீசாருக்கு தகவல் அளித்தனர். போலீசார் மற்றும் நிபுணர்கள், கைரேகைகளை பதிவு செய்தனர். கண்காணிப்பு கேமரா காட்சிகளை ஆய்வு செய்த போது, கோவில் வலதுபுறம் மண்டபத்தில் இருந்து, 25 வயது மதிக்கத்தக்க நபர் ஒருவர், சுவர் ஏறி குதித்து உள்ளே நுழைந்து, உண்டியலை உடைத்து கொள்ளையடிக்கும் காட்சி பதிவாகியிருந்தது. உண்டியலில் ரூ.15 ஆயிரம் முதல் 20 ஆயிரம் வரை இருந்திருக்கலாம் என போலீசார் தெரிவித்தனர். போலீசார் வழக்குப்பதிந்து, மர்ம நபரை தேடி வருகின்றனர்.