பேரூர்: பச்சாபாளையத்தில் உள்ள செல்வ விநாயகர் கோவில் கும்பாபிஷேகம் கோலாகலமாக நடந்தது.

பச்சாபாளையம், ராம்ஜி ஹில் வியூவில் புதியதாக அமைக்கப்பட்டுள்ள ஸ்ரீ செல்வ விநாயகர் கோவில் கும்பாபிஷேகம் நேற்று விக்னேஷ்வர பூஜையுடன் துவங்கியது. தொடர்ந்து, இறை அனுமதி பெறுதல், கலச பூஜை, மஹா கணபதி ஹோமம், மஹா சுதர்சன ஹோமம், நவகிரக சாந்தி, வாஸ்து பூஜை உள்ளிட்டவைகள் நடந்தது. அதன் பின் புதிய விக்கிரகங்களுக்கு அபிஷேகம், சுவாமிகளுக்கு கண் திறப்பு நடந்தது. மாலையில் முளைப்பாரி, சீர் தட்டுகள் மற்றும் தீர்த்த குடங்கள் ஊர்வலம் நடந்தது. இரவு, முதல் காலை யாக பூஜை நடந்தது. இன்று அதிகாலை, 6:00 மணிக்கு, மங்கல இசை, திருப்பள்ளி எழுச்சி, இரண்டாம் கால யாக பூஜை நடந்தது. தொடர்ந்து, காலை, 9:20 மணிக்கு, யாகசாலையில் இருந்து கலசங்கள் கோவிலை சுற்றி எடுத்து வரப்பட்டது. காலை, 9:30 மணிக்கு, பிரசன்ன வெங்கடேஷ் சுவாமிகள் தலைமையில், விமான கோபுரத்திற்கும், செல்வ விநாயகருக்கும், மஹா கும்பாபிஷேகம் செய்யப்பட்டது. அதனைத்தொடர்ந்து, செல்வ விநாயகருக்கு சிறப்பு அலங்காரம் செய்யப்பட்டு, மஹா தீபாராதனை நடந்தது. இதில், ராம்ஜி ஹில் வியூ உரிமையாளர் ராம்ஜி, பேரூர் செட்டிபாளையம் ஊராட்சி மன்ற தலைவர் சாந்தி பிரசாத், தர்மராஜா அருள் பீடம் கிருஷ்ணமூர்த்தி சுவாமிகள் மற்றும் ஏராளமான பக்தர்கள் கலந்து கொண்டனர். ராம்ஜி ஹில் வியூ குடும்பத்தார் நிகழ்ச்சிக்கான ஏற்பாடுகளை செய்திருந்தனர்.