மேட்டுப்பாளையம்: சிறுமுகை பாலசுப்பிரமணியர் கோவிலில் நடந்த, மண்டல பூஜை நிறைவு விழாவில், ஏராளமான பக்தர்கள் பங்கேற்றனர்.

சிறுமுகை பழத்தோட்டத்தில், பவானி ஆற்றின் கரையோரம், ஆயிரம் ஆண்டுகள் பழமையான பாலசுப்பிரமணியர் கோவில் உள்ளது. இக்கோவில் கும்பாபிஷேகம் கடந்த மாதம், 24ம் தேதி நடந்தது. இதை அடுத்து, 48 நாட்கள் மண்டல பூஜை நடைபெற்று வந்தது. ஒவ்வொரு நாளும் பாலசுப்பிரமணியருக்கு சிறப்பு அலங்காரம் செய்து, அபிஷேக பூஜை செய்தனர். மண்டல பூஜை நிறைவு விழா இன்று நடந்தது. காலை, 5:30 மணிக்கு நடை திறந்து, சிறப்பு பூஜை செய்தனர். பின்பு சிறுமுகை மற்றும் சுற்று வட்டார ஏழு ஊர்களில் இருந்து, பக்தர்கள் பால்குடம், தீர்த்த குடங்களை எடுத்து வந்து, பால் மற்றும் தீர்த்த அபிஷேகம் செய்தனர். அதை தொடர்ந்து, 108 வலம்புரி சங்கு வழிபாடு வேள்வி பூஜைகள் நடந்தன. இந்த விழாவில் ஓதிமலை ஆதீனம் சிவனேச அடிகளார் அருளாசி வழங்கினார். இந்த விழாவில் ஏராளமான பக்தர்கள் பங்கேற்றனர். சிறுமுகை சுற்று வட்டாரத்தில் உள்ள பஜனை குழுவினரின், நாம சங்கீர்த்தன பஜனை, பரத நாட்டியம் ஆகிய கலை நிகழ்ச்சிகள் நடந்தன. விழா ஏற்பாடுகளை திருப்பணிகள் குழுவினர், கிருத்திகை வழிபாட்டு குழுவினர், ஊர் பொதுமக்கள் ஆகியோர் செய்தனர்.