கோவை: சர்வதேச யோகா தினத்தை முன்னிட்டு ஈஷாவில் உள்ள ஆதியோகி முன்பு ஏராளமான சி.ஆர்.பி.எப் படை வீரர்களுக்கு இன்று யோகா கற்றுக் கொடுக்கப்பட்டது.

இன்று (ஜூன் 21) சர்வதேச யோகா தினம். பெரும்பாலான மையங்களில் ஒருவார கால இலவச பயிற்சி, குறிப்பாக பெண்களுக்காகவே நடத்தப்படுகிறது. அதை கற்றுக் கொண்டால் மனஅழுத்தத்தில் விடுபட்டு சந்தோஷமாக வாழலாம் என்கின்றனர் நிபுணர்கள். சர்வதேச யோகா தினத்தை முன்னிட்டு, ஈஷா யோகா மையம் சார்பில் கோவை விமான நிலையம், ஆதியோகி, சூலூர் விமான படை தளம் உள்ளிட்ட பல்வேறு இடங்களில் சிறப்பு யோகா நிகழ்ச்சிகள் இலவசமாக நடத்தப்பட்டன. இதில் ஆயிரக்கணக்கானோர் பங்கேற்று பயன்பெற்றனர். ஆதியோகி முன்பு நடைபெற்ற நிகழ்ச்சியில் நூற்றுக்கணக்கான சி.ஆர்.பி.எஃப் படை வீரர்கள் பங்கேற்று யோகா கற்றுக்கொண்டனர். இந்நிகழ்ச்சிகளில் சத்குருவால் வடிவமைக்கப்பட்ட யோக நமஸ்காரம், நாடி சுத்தி போன்ற பயிற்சிகள் கற்றுக்கொடுக்கப்பட்டன. இப்பயிற்சிகளை தொடர்ந்து செய்து வருவதன் மூலம் முதுகு தண்டும், நரம்பு மண்டலமும் வலுபெறும். மன அழுத்தம் குறையும், உடல் மற்றும் மன நலன் மேம்படும். கோவையில் பல்வேறு இடங்களில் இலவச யோகா வகுப்புகள் நடைபெற்று வருவது குறிப்பிடத்தக்கது.