கோபால்பட்டி,  சாணார்பட்டி அருகே கம்பிளியம்பட்டி வரசித்தி வாராஹி அம்மன் கோவிலில் உலக நன்மை வேண்டி, அமாவாசை அஸ்வாரூடா வாராஹி யாகத்தில் ஏராளமான பக்தர்கள் கலந்து கொண்டனர்.

பூஜையையொட்டி கோவிலில் உள்ள யாகசாலையில் வாராஹி கவசங்களுக்கு பூக்களால் அலங்கரிக்கப்பட்டு, அம்மன் பூ அலங்காரத்தில் எழுந்தருள, உலக நன்மை வேண்டி பூஜைகள் செய்யப்பட்டது. யாகத்தினை திண்டுக்கல் குமாரசாமி குருக்கள் நடத்தி வைத்தார். மதுரை , தேனி, திருச்சி, சிவகங்கை உள்ளிட்ட மாவட்டங்களில் இருந்து வந்த ஏராளமான பக்தர்கள் தங்கள் வேண்டுதல்களை நிறைவேற்றினர். வெளிமாநில ,வெளிநாட்டு பக்தர்கள் இணைய தளம் மூலமாக பூஜையில் பங்கேற்க ஏற்பாடு செய்யப்பட்டிருந்தது. வாராஹி அறக்கட்டளை மூலம் அன்னதானம் வழங்கப்ப்பட்டது. விழா ஏற்பாடுகளை சஞ்சீவி சுவாமிகள், கம்பிளியம்பட்டி ஊர் பொது மக்கள் மற்றும் திண்டுக்கல் மாவட்ட வாராஹி பக்தர்கள் ஏற்பாடு செய்திருந்தனர்.