திருச்செந்துார்: திருச்செந்துார், சுப்பிரமணிய சுவாமி கோயிலில், தொடர் விடுமுறையை முன்னிட்டு, திரளான பக்தர்கள் சுவாமி தரிசனம் செய்தனர். முருகப் பெருமானின் அறுபடை வீடுகளில், 2ம் படை வீடான திருச்செந்துார், சுப்பிரமணிய சுவாமி கோயில் நேற்று அதிகாலை 4:00 மணிக்கு திறக்கப்பட்டு, 4:30 மணிக்கு விஸ்வரூப தீபாராதனையும், 6:00 மணிக்கு உதயமார்த்தாண்ட அபிஷேகமும் நடந்தது. பின்னர் 10:30 மணிக்கு உச்சி கால அபிஷேகமும், தீபாராதனையும் நடந்தது. மாலையில் சாயரட்சை தீபாராதனை நடந்தது. தொடர்ந்து மற்ற கால பூஜைகள் நடந்தன. சுப்பிரமணிய சுவாமி கோயிலுக்கு, தமிழகம் மட்டுமல்லாமல் வெளி மாநிலம், வெளிநாடுகளில் இருந்தும் பக்தர்கள் வந்து செல்கின்றனர். கோயிலுக்கு திருவிழா காலங்களில் லட்சக்கணக்கான பக்தர்களும், தினசரி ஆயிரக்கணக்கான பக்தர்களும் வந்து செல்கின்றனர். இந்நிலையில்,நேற்று அரசு விடுமுறை மற்றும் பள்ளிகளுக்கு தொடர் விடுமுறை என்பதால், திரளான பக்தர்கள் குடும்பத்துடன் வந்து கடலில் புனித நீராடி நீண்ட வரிசையில் நின்று தரிசனம் செய்தனர்.