பழநி: பழநி முருகன் கோவிலுக்கு விடுமுறையை முன்னிட்டு பக்தர்கள் வருகை அதிகளவில் இருந்தது.

பழநி முருகன் கோயிலுக்கு வெளியூர், வெளி மாநில பக்தர்கள் வருகை புரிந்தனர். பொது, கட்டண தரிசன வரிசையில் பக்தர்கள் இரண்டு மணி நேரம் காத்திருந்து சுவாமி தரிசனம் செய்தனர். மலைக்கோயில் செல்ல, வின்ச், ரோப் கார் வரிசையிலும் பக்தர்கள் காத்திருந்து டிக்கெட் பெற்றனர். மலைக் கோயிலில் வெயிலில் தாக்கம் அதிகம் இருந்ததால் பக்தர்கள் மிகுந்த சிரமத்திற்கு உள்ளானார்கள். அலைபேசிகளை கொண்டு செல்ல தடை விதிக்கப்பட்டதால் பக்தர்கள் கோயில் வளாகத்தில் தங்கள் உறவினர்களை கண்டறிய, கோயில் வளாகத்தில் குறிப்பிட்ட இடத்திற்கு வந்து சேருமாறு என அதிக அளவில் மலைக்கோயிலில் அறிவிப்பு செய்யப்பட்டது. பழநி மலை அடிவாரம், கிரிவீதி, சன்னதி வீதியில் ஆக்கிரமிப்பு அதிகளவில் இருந்தது. இதனால் வாகனங்கள் செல்ல சிரமம் ஏற்பட்டது திருஆவினன்குடி கோயிலில் கூட்டம் அதிகம் இருந்தது. அடிவாரம், கிரிவீதி, அய்யம்புள்ளி ரோடு உள்ளிட்ட முக்கிய வீதிகளில் வாகனங்களை நிறுத்தி இருந்ததால் போக்குவரத்து நெரிசல் ஏற்பட்டது. பழநி நகரில் முக்கிய வீதிகளில் வாகன நெரிசலால் பொதுமக்கள் சிரமம் அடைத்தனர்.