திருமங்கலம்; மதுரை மாவட்டம் கள்ளிக்குடி அருகே வடக்கம்பட்டியில் ஸ்ரீ முனியாண்டி சாமி திருக்கோயிலின் 89 ஆவது ஆண்டு பூஜை விழா நடந்தது. பக்தர்களுக்கு பிரியாணி பிரசாதமாக வழங்கப்பட்டது.

முனியாண்டி சுவாமி கோவிலில் தமிழகம் மற்றும் வெளி மாநிலங்கள், நாடுகளில் முனியாண்டி விலாஸ் என்ற பெயரில் ஹோட்டல் நடத்தி வருபவர்கள் தங்கள் குடும்பத்துடன் 2 நாட்கள் வடக்கம்பட்டி கிராமத்தில் ஒன்று கூடி சாமி கும்பிடுவர்.‌ நிகழ்ச்சியில் 300-க்கும் மேற்பட்ட பெண்கள் தலையில் மலர் தட்டுக்களுடன் கிராம முக்கிய வீதிகளின் வழியாக வலம் வந்து , வான வேடிக்கைகள் முழங்க, ஆட்டம், பாட்டத்துடன் முனியாண்டி சாமிக்கு மலர் அபிஷேகம் செய்து, தங்களுடைய நேர்த்திக்கடனை நிறைவு செய்தனர். இம்முனியாண்டி சாமி நினைத்த காரியத்தை நிறைவேற்றி தருவார் என்பது ஐதீகம். பக்தர்கள் தாங்கள் நேர்ந்து கொண்ட கடனை தீர்க்கும் வகையில் ஆடு, மற்றும் சேவல்களை திருக்கோயில்களில் காணிக்கையாக அளிப்பர். அவ்வாறு அளிக்கக் கூடிய ஆடு , சேவல்களை கோவில் முன்பு பலியிட்டு, பின்பு சமைத்து அதனை பிரியாணியாக தயார் செய்து, அங்கு கூடும் பக்தர்களுக்கு பிரசாதமாக வழங்குவர். இதன் காரணமாகவே இந்த விழா பிரியாணி திருவிழா என்று அழைக்கப்படுகிறது. இதனால் வடக்கம்பட்டி கிராமமே கமகம பிரியாணி மணத்தில் மிதந்தது.