சபரிமலை; மாசி மாத பூஜைகளுக்காக சபரிமலை நடை நாளை மாலை திறக்கப்படுகிறது. வரும் 18 வரை பூஜைகள் நடைபெறும்.

சபரிமலையில் மகர விளக்கு கால பூஜைகள் முடிந்து கடந்த ஜன., 21ல் நடை அடைக்கப்பட்டது. அதன் பின்னர் மாசி மாத பூஜைகளுக்காக நாளை மாலை 5:00மணிக்கு நடை திறக்கப்படுகிறது. புதிய மேல் சாந்தி மகேஷ் நம்பூதிரி நடை திறந்து தீபம் ஏற்றிய பின்னர் பக்தர்கள் தரிசனத்துக்கு அனுமதிக்கப்படுவார்கள். நாளை வேறு பூஜைகள் எதுவும் நடைபெறாது. இரவு 10:00மணிக்கு நடை அடைக்கப்படும். 14ம் தேதி அதிகாலை 5:00 மணிக்கு நடை திறந்ததும் நிர்மால்ய தரிசனத்துக்கு பின்னர் தந்திரி மகேஷ் மோகனரரு, ஐயப்பன் விக்கிரகத்தில் அபிஷேகம் நடத்தி நெய்யபிஷேகத்தை தொடங்கி வைப்பார். அதைத் தொடர்ந்து கணபதி ஹோமம், உஷ பூஜை, களபாபிஷேகம், உச்ச பூஜை, மாலையில் தீபாராதனை, புஷ்பாபிஷேகம். அத்தாழ பூஜை ஆகியவை நடைபெறும். எல்லா நாட்களிலும் உதயாஸ்தமன பூஜையும், இரவு 7:00 மணிக்கு படி பூஜையும் நடைபெறும். 18 இரவு 10:00 மணிக்கு நடை அடைக்கப்படுகிறது.