செஞ்சி; மேல்மலையனுார் அங்காளம்மன் கோவிலில் நேற்று இரவு நடந்த ஊஞ்சல் உற்சவத்தில் ஆயிரக்கணக்கான பக்தர்கள் கலந்து கொண்டு தரிசனம் செய்தனர்.

விழுப்புரம் மாவட்டம் மேல்மலையனுார் அங்காளம்மன் கோவிலில் நேற்று இரவு பங்குனி மாத அமாவாசையை முன்னிட்டு ஊஞ்சல் உற்சவம் நடந்தது. அன்று காலை அங்காளம்மனுக்கு சிறப்பு அபிஷேகம் மற்றும் தங்க கவச அலங்காரம் செய்தனர். இரவு 11 மணிக்கு சர்வ லோகேஸ்வரி அலங்காரத்தில் அம்மன் ஊஞ்சல் மண்டபத்தில் எழுந்தருளினார். அங்கு தீபாராதனையுடன் ஊஞ்சல் உற்சவம் துவங்கியது. கூடியிருந்த ஆயிரக்கணக்கான பக்தர்கள் கற்பூரதீபம் ஏற்றி அம்மனை வழிபட்டனர். கோவில் பூசாரிகளும், பக்தர்களும் அம்மன் பக்தி பாடல்களையும், தாலாட்டு பாடல்களையும் பாடினர். அப்போது நுாற்றுக்கணக்கானவர்கள் சாமி வந்து ஆடினர். உதவி ஆணையர் ஜீவானந்தம், அறங்காவலர் குழு தலைவர் சுரேஷ் மற்றும் அறங்காவலர்கள் விழா ஏற்பாடுகளை செய்தனர். செஞ்சி டி. எஸ்.பி., கவினா தலைமையில் 400க்கும் மேற்பட்ட போலீசார் பாதுகாப்பு பணிகளை செய்தனர். சென்னை, புதுச்சேரி, வேலுார், விழுப்புரம் உட்பட பல்வேறு ஊர்களில் இருந்தும சிறப்பு பஸ்களை இயக்கினர்.