காஞ்சிபுரம்; காஞ்சிபுரத்தில் பல்வேறு அம்மன் கோவில்களில் இன்று ஆடி திருவிழாவையொட்டி, அம்மன் வீதியுலாவும், கூழ்வார்த்தலும், கும்பம் படையலுடன் அம்மன் வர்ணிப்பு நடந்தது.

காஞ்சிபுரம் மாநகராட்சி, திருக்காலிமேடு கிராம தேவதை திருவாத்தி அம்மனுக்கு 10ம் ஆண்டு ஆடித் திருவிழா இன்று நடந்தது. விழாவையொட்டி நேற்று, காலை 6:00 மணிக்கு அம்மனுக்கு சிறப்பு அபிஷேசமும், மூலவர் அம்மனுக்கு, குறி சொல்லும் குறத்தி அம்மன் அலங்காரமும், தொடர்ந்து ஜலம் திரட்டுதலும், உற்சவர் அம்மன் வீதியுலாவும் நடந்தது. மதியம் 1:00 மணிக்கு கூழ்வார்த்தலும், மாலை 3:00 மணிக்கு ஊரணி பொங்கல் வைக்கப்பட்டது. மாலை 6:00 மணிக்கு உற்சவர் அம்மன் ஊஞ்சல் சேவை அலங்காரத்தில் பக்தர்களுக்கு அருள்பாலிக்கிறார். இரவு 8:30 மணிக்கு கும்பம் படையலிடப்பட்டு அம்மன் வர்ணிப்பு நடக்கிறது. நாளை இரவு 9:00 மணிக்கு சிங்காடிவாக்கம் ஏகாத்தம்மன் நாடக மன்றத்தினரின் நாடகம் நடைபெறுகிறது.

காஞ்சிபுரம், திருக்காலிமேடு பிரதான சாலை, பாக்ரா பேட்டை, உப்பு குளம் நாக கன்னியம்மன் கோவிலில் ஆடி திருவிழாவையொட்டி காலை 11:00 மணிக்கு 108 பால்குட ஊர்வலமும், அம்மன் குடம் வீதியுலாவும், மதியம் 12:00 மணிக்கு கூழ்வார்த்தலும், மாலை 5:00 மணிக்கு அம்மன் வீதியுலாவும், கும்பம் படையலும் நடந்தது. விழாவில் திரளான பக்தர்கள் பங்கேற்றனர். காஞ்சிபுரம் ரயில்வே சாலை தண்டுமுத்து மாரியம்மன் கோவிலில் ஆடி திருவிழாவையொட்டி காலை, அம்மன் கரகம் வீதியுலா வந்தது. மதியம் 12:00 மணிக்கு கோவில் வளாகத்தில் கூழ்வார்த்தல் விழாவும், மாலை 4:00 மணிக்கு ஊரணி பொங்கல் வைத்தலும், இரவு 7:00 மணிக்கு அம்மன் வீதியுலாவும், 9:00 மணிக்கு கும்பம் படையலிடப்பட்டு அம்மன் வர்ணிப்பு நடந்தது.