சபரிமலை; நிறைப்புத்தரிசி பூஜைகளுக்காக சபரிமலை நடை இன்று மாலை திறந்தது. நாளை காலை தந்திரி மகேஷ் மோகனரரு தலைமையில் நிறைப்புத்தரிசி பூஜை நடைபெறும்.

எல்லா ஆடி மாதத்திலும் சபரிமலையில் நிறைப்புத்தரிசி பூஜை நடைபெறுகிறது. திருவிதாங்கூர் தேவசம்போர்டுக்கு சொந்தமான பாலக்காடு மற்றும் அச்சன் கோயில் வயல்களில் சாகுபடி செய்யப்பட்ட நெற்கதிர்களை அறுவடை செய்து பவனியாக சபரிமலை கொண்டு வந்து ஐயப்பனுக்கு நிறைப்புத்தரிசி பூஜை நடைபெறுகிறது. இதற்காக இன்று மாலை 5:00 மணிக்கு மேல் சாந்தி மகேஷ் நம்பூதிரி நடை திறந்து தீபம் ஏற்றினார். தொடர்ந்து நெற்கதிர்கள் சன்னிதானத்திற்கு கொண்டுவரப்பட்டது. வேறு விசேஷ பூஜைகள் எதுவும் நடைபெறவில்லை. இரவு 10:00 மணிக்கு நடை அடைக்கப்பட்டது.

நாளை அதிகாலை 5:00 மணிக்கு நடை திறந்ததும் ஐயப்பன் விக்ரகத்தில் அபிஷேகம் செய்யப்பட்ட பின்னர் நிறைப்புத்தரிசி பூஜை சடங்குகள் தொடங்கும். மேல் சாந்தி மகேஷ் நம்பூதிரி நெற்கதிர்களை தலையில் சுமந்து கோயிலை வலம் வந்து ஸ்ரீ கோயிலுக்குள் கொண்டு செல்வார். அங்கு நெற்கதிர்களுக்கு தந்திரி மகேஷ் மோகனரரு பூஜைகள் நடத்துவார். பின்னர் அந்த நெற்கதிர்கள் பக்தர்களுக்கு பிரசாதமாக வழங்கப்படும். தொடர்ந்து வழக்கமான உஷ பூஜை, களபாபிசேகம், உச்ச பூஜை , படி பூஜை, அத்தாழபூஜை நடைபெறும். இரவு 10:00 மணிக்கு நடை அடைக்கப்படும்.