ஆத்தூர்: ஆத்தூர் அருகே வீட்டு வசதி வாரிய குடியிருப்பு பகுதியில் அமைந்துள்ள ஸ்ரீ செல்வ விநாயகர் ஸ்ரீ மகா சக்தி மாரியம்மன் கோவில் கும்பாபிஷேக விழா; ஏராளமான பொதுமக்கள் கலந்து கொண்டு சாமி தரிசனம் செய்தனர்.

சேலம் மாவட்டம், ஆத்தூர் அருகே நரசிங்கபுரம் நகராட்சிக்கு உட்பட்ட பழைய வீட்டு வசதி நகர் பகுதியில் அமைந்துள்ள மகாசக்தி மாரியம்மன் கோவில், விநாயகர் திருக்கோவில் 12 ஆண்டுகளுக்கு பின் புனரமைக்கப்பட்டு மஹாகும்பாபிஷேக விழா நடத்த முடிவு செய்யப்பட்டது. தொடர்ந்து நேற்று கணபதி ஹோமம்,லட்சுமி ஹோமம்,நவகிரக ஹோமம் உள்ளிட்ட பல்வேறு நிகழ்ச்சிகள் நடைபெற்று முடிந்த நிலையில் இன்று காலை கோ பூஜை, இரண்டாம் கால பூஜைகள் நடைபெற்றது. பின்னர் வேத மந்திரம் முழங்க சிவாச்சாரியார்கள் புனித நீரை தலையில் சுமந்தவாறு மேளதாள முழங்க கோவிலை சுற்றி வந்து கோபுர கலசத்திற்கு புனித நீர் ஊற்றி மஹா கும்பாபிஷேகம் செய்தனர். தொடர்ந்து, மகா மாரியம்மன், ஸ்ரீ செல்வ விநாயகர் மூலவர் சிலைக்கு புனித நீரை ஊற்றி கும்பாபிஷேக விழா நடைபெற்று, பக்தர்களுக்கு புனித நீர் தெளிக்கப்பட்டு அம்மனுக்கு சிறப்பு அலங்காரம் செய்யப்பட்டது. தீபாராதனை  நடைபெற்றது. இந்நிகழ்ச்சியில் ஏராளமான பொதுமக்கள் கலந்து கொண்டு சாமி தரிசனம் செய்தனர்.