பாலக்காடு; பாலக்காடு மேற்கு யாக்கரை அய்ப்பன் கோவிலில் அயப்பன் விளக்கு மகோற்சவம் கோலாகலமாக நடைபெற்றது.

கேரள மாநிலம் பாலக்காடு மேற்கு யாக்கரை மகாவிஷ்ணு கோவில் அருகே உள்ளது அய்ப்பன் கோவில். இங்கு எல்லா ஆண்டும் அயப்பன் விளக்கு மகோற்சவம் வெகு விமர்சையாக கொண்டாடுவது வழக்கம். நடப்பாண்டு மகோற்சவம் நேற்று காலை 5:30 மணிக்கு மகாகணபதி ஹோமத்துடன் துவங்கியது. 7:30 மணிக்கு நிறமாலை, உஷ பூஜை ஆகியவை நடந்தன. இதையடுத்து பல்லாவூர் ஸ்ரீதரன் மாரார் தலைமையிலான 50க்கும் மேற்பட்ட கலைஞர்கள் பங்கு கொண்ட பஞ்சாரி மேளம் முழங்க மூன்று யானைகளின் அணிவகுப்பு நடைபெற்றது. தொடர்ந்து மூலவருக்கு அபிஷேகம் செய்வதற்கான தீர்த்தம் கொண்டு வரும் நிகழ்வு நடந்தது. 11:00 மணிக்கு சிறப்பு பூஜை, நவகம், பஞ்சகவ்யம், உச்சபூஜை ஆகியவை நடந்தன. மதியம் 12:00 மணிக்கு அணிவகுப்பில் கலந்து கொண்ட யானைகளுக்கு உணவளிக்கும் நிகழ்வு நடந்தது. 5:00 மணிக்கு பஞ்சாரி மேளம் மற்றும் மேளதாளங்கள் முழங்க மூன்று யானைகள் அணிவகுப்புடன் உற்சவர் எழுந்தருளி பக்தர்களுக்கு அருள் பாலிக்கும் நிகழ்வு நடைபெற்றது. 6:00 மணிக்கு சுற்று விளக்கேற்றி பக்தர்கள் வழிபடும் நிகழ்ச்சி நடந்தன. இதையடுத்து மூலவருக்கு மகா தீபாராதனை நடைபெற்றது. 9:00 மணிக்கு மண்டல பூஜை, சாஸ்தாம் பாட்டு ஆகியவை நடந்தன. இன்று நடக்கும் சிறப்பு பூஜைகளுடன் உற்சவம் நிறைவுபெறுகிறது.