தொண்டாமுத்தூர்; கோவை ஈஷா யோகா மையத்தில், இந்திய கடற்படை வீரர்கள், பாரம்பரிய ஹத யோகா பயிற்சியை நிறைவு செய்தனர்.

இந்திய பாதுகாப்பு படை வீரர்களை ஹத யோகா பயிற்றுனர்களாக உருவாக்கும் வகையில், ஈஷாவில், பாதுகாப்பு படைகளுக்கான பாரம்பரிய ஹத யோகா பயிற்சி நிகழ்ச்சி நடத்தப்பட்டு வருகிறது. அவ்வகையில், கோவை ஈஷா யோகா மையத்தில், கடந்த, 15 நாட்களாக, இந்தியக் கடற் படையை சேர்ந்த வீரர்களுக்கு, ஹத யோகா பயிற்சி வழங்கப்பட்டது. இதில், ஹத யோகாவின் பிரிவுகளான உபயோகா, அங்கமர்தனா, சூரிய க்ரியா ஆகியவற்றில் பயிற்சிகள் அளிக்கப்பட்டன. பயிற்சி பெற்ற வீரர்கள், இதனைத் தொடர்ந்து, கடற்படை முகாம்களில் உள்ள சக வீரர்களுக்கும் இந்த ஹத யோகா பயிற்சிகளை வழங்கவுள்ளனர். 

இதுகுறித்து ஈஷா அறக்கட்டளை நிறுவன சத்குரு வெளியிட்டுள்ள பதிவில் கூறப்பட்டுள்ளதாவது: இந்திய பாதுகாப்பு படைகளுக்கான பாரம்பரிய ஹத யோகா பயிற்சி நிகழ்ச்சியை வெற்றிகரமாக முடித்த, 72 இந்திய கடற்படை வீரர்களுக்கு வாழ்த்துக்கள். நீங்கள் தேசத்திற்கு உயர்ந்த சேவையை வழங்கும்போது, உங்கள் உடலும், மனமும் நீங்கள் நினைக்கும் விதத்தில், செயல்படுவது மிக முக்கியம். ஹத யோகா, உங்களுக்கு எந்த சூழ்நிலையையும் சமநிலை மற்றும் தெளிவுடன் கடந்த செல்ல தேவையான வலிமையையும், உறுதியையும் அளிக்கும். உங்கள் அனைவருக்கும் எங்கள் நன்றி, வாழ்த்துக்கள் மற்றும் ஆசைகள். இவ்வாறு சத்குரு பதிவிட்டுள்ளார்.