சபரிமலை; சபரிமலையில் 10 நாள் பங்குனி உத்திர திருவிழா இன்று காலை கொடியேற்றத்துடன் தொடங்கியது. வரும் 11-ம் தேதி வரை விழா நடைபெறுகிறது.

பங்குனி உத்திர திருவிழா மற்றும் சித்திரை விஷூ பூஜைகளுக்காக சபரிமலை நடை நேற்று மாலை திறந்தது. அன்று இரவு 10:00 மணிக்கு நடை அடைக்கப்பட்டது. இன்று அதிகாலை 5:00 மணிக்கு நடை திறந்த பின்னர் வழக்கமான பூஜைகள் தொடங்கியது. காலை 9:00 மணிக்கு பிம்ப சுத்தி பூஜைகளை தொடர்ந்து கோயில் முன்புறம் உள்ள மண்டபத்தில் கொடி பட்டத்திற்கு தந்திரி கண்டரரு ராஜீவரரு சிறப்பு பூஜைகள் நடத்தினார். தொடர்ந்து கொடி பட்டம் கோயிலை சுற்றி வலம் வந்து கொடிமரம் அருகே கொண்டுவரப்பட்டது. அங்கு சிறப்பு பூஜைகளுக்கு பின்னர் 10:00 மணிக்கு கொடிமரத்தில் கொடியேற்றப்பட்டது. அப்போது பக்தர்கள் சரண கோஷம் எழுப்பினர். நாளை முதல் ஒன்பதாம் நாள் விழா வரை தினமும் மதியம் உச்ச பூஜைக்கு முன்னோடியாக உற்சவபலி நடைபெறுகிறது. 10-ம் தேதி இரவு அத்தாழ பூஜைக்கு பின்னர் சுவாமி பள்ளி வேட்டைக்காக சரங்குத்திக்கு எழுந்தருளுவார். 11-ம் தேதி காலை நடை திறந்த பின்னர் உஷ பூஜை நிறைவு பெற்றதும் யானை மீது சுவாமி பம்பைக்கு எழுந்தருளும் நிகழ்ச்சி நடைபெறுகிறது. மதியம் இங்கு சுவாமிக்கு ஆராட்டு நடைபெறும். அதன் பின்னர் மாலை 3:00 ,மணிக்கு சுவாமி சன்னிதானத்துக்கு திரும்ப எழுந்து அருள்வார் சன்னிதானம் வந்ததும் திருக்கொடி இறக்கப்பட்டு விழா நிறைவு பெறும். எனினும் சித்திரை விஷு பூஜைகளுக்காக நடை திறந்திருக்கும். 14 -ம் தேதி சித்திரை விஷு சிறப்பு பூஜைகள் நடைபெறுகிறது. 18 இரவு 10:0மணிக்கு நடை அடைக்கப்படும்.