திருச்சி; ஸ்ரீரங்கம் அரங்கநாதசுவாமி கோவிலில் பங்குனி திருவிழா ஆதி பிரம்மோத்ஸவம் இன்று கொடியேற்றத்துடன் (துவஜாரோஹாணம்) துவங்கியது.

வைணவ திவ்யதேசங்கள் 108ல் முதன்மையானதும், ஆழ்வார்கள் பதின்மரால் மங்களாசாசனம் செய்யப்பெற்றதும், பூலோக வைகுண்டமுமான திருவரங்கம் திருக்கோயில் ஆதிபிரம்மோத்ஸவத்தில் நேற்று அங்குரார்ப்பத்தம் நடைபெற்றது. விபீஷணாழ்வார் ஸ்ரீரங்க விமானத்தை அயோத்தியிலிருந்து இலங்கைக்கு எடுத்துச் செல்லுகையில் சந்திரபுஷ்கரணி கரையில் இறக்கி வைத்தார். உறையூரில் அப்பொழுது அரசனாயிருந்த தர்மவர்மா மறுநாள் பிரம்மா ஏற்படுத்திய உத்ஸவம் நடத்த வேண்டிய தினமாக இருந்ததால், தர்மவர்மா கோரிக்கையை ஏற்று விபீஷணாழ்வார் இந்த பிரம்மோத்ஸவத்தை நடத்த அனுமதித்தார் என ஸ்ரீரங்க மஹாத்மியத்திலும், லக்ஷ்மி காவியத்திலும் காணப்படுகிறது. 

இன்று கொடியேற்றம் நடைபெற்றது. முன்னதாக ஸ்ரீநம்பெருமாள் அதிகாலை 3.15 மணிக்கு மூலஸ்தானத்திலிருந்து புறப்பட்டு துவஜாரோஹண மண்டபம் சேர்ந்தார். அதிகாலை 3.45 மணி கொடிப்படம் புறப்படுதல் நடைபெற்று, அதிகாலை 4.15 மணி துவஜாரோஹணம் (கொடியேற்றம்) மின லக்னத்தில் நடைபெற்றது. தொடர்ந்து பெருமாள் வாகனமண்டபத்திலிருந்து புறப்பாட்டு கண்ணாடி அறை சேர்ந்தார். இதில் ஏராளமான பக்தர்கள் கலந்து கொண்டு தரிசனம் செய்தனர். பதினொன்று நாட்கள் இந்த உத்ஸவம் 13ம் தேதி ஞாயிற்றுக்கிழமை வரை நடைபெற உள்ளது. பங்குனி தேர் (கோரதம்) 12ம் தேதி (சனிக்கிழமை) நடைபெற உள்ளது. விழாவை முன்னிட்டு நாளை முதல் 12ம் தேதி வரை விஸ்வரூப சேவை கிடையாது.