ஸ்ரீவில்லிபுத்துார்; விருதுநகர் மாவட்டம் ஸ்ரீவில்லிபுத்துார் ஆண்டாள் கோயிலில் திருக்கல்யாண திருவிழா இன்று கொடியேற்றத்துடன் துவங்கியது.

இதனை முன்னிட்டு இன்று காலை 9:15 மணிக்குமேல் கொடிப்பட்டம் மாடவீதிகள், ரத வீதிகள் சுற்றி வந்து கோயிலுக்கு கொண்டுவரப்பட்டது. இதனையடுத்து கொடி மரத்தின் முன்பு சிறப்பு பூஜைகள் செய்யப்பட்டு காலை 11:00 மணிக்கு ஸ்ரீவாரி பிரபு பட்டர் கொடி பட்டம் ஏற்றினார். திரளான பக்தர்கள் பங்கேற்று ஆண்டாள், ரெங்க மன்னாரை தரிசித்தனர். விழா ஏற்பாடுகளை அறங்காவலர் குழு தலைவர் வெங்கட்ராம ராஜா தலைமையில் அறங்காவலர்கள், செயல் அலுவலர் சக்கரையம்மாள், கோயில் பட்டர்கள் செய்திருந்தனர். இதனைத் தொடர்ந்து தினமும் காலை 10:00 மணிக்கு ஆண்டாள், ரெங்கமன்னார் மண்டபம் எழுந்தருளலும், இரவு 7:00 மணிக்கு வீதி உலாவும் நடக்கிறது. முக்கிய நிகழ்ச்சியான திருக்கல்யாண திருவிழா ஏப். 11ல் நடக்கிறது. அன்று காலை 7:00 மணிக்கு செப்பு தேரோட்டமும், மாலை 5:30 மணிக்கு ஆடிப்பூர பந்தலில் ஆண்டாள், ரெங்க மன்னார் திருக்கல்யாண வைபவமும் நடக்கிறது.