பெ.நா.பாளையம்; பெரியநாயக்கன்பாளையம் அருகே சாமநாயக்கன்பாளையத்தில் ஏழுமலையப்பன் வெங்கடேஸ்வர சுவாமி பிரதிஷ்டை விழா நடந்தது. இதில், திரளான பக்தர்கள் கலந்து கொண்டனர்.

பெரியநாயக்கன்பாளையம் அருகே வெள்ளமடை ஊராட்சிக்கு உட்பட்ட சாமநாயக்கன்பாளையம் ஆண்டாள் திருநாச்சியார் சமேத ஸ்ரீ ரங்க மன்னார் திருக்கோயில் வளாகத்தில் ஏழுமலையப்பன் வெங்கடேஸ்வர பெருமாள்சாமி பிரதிஷ்டை செய்யும் விழா நடந்தது. நிகழ்ச்சியை ஒட்டி நேற்று முன்தினம் மாலை, 3:00 மணிக்கு பிரதிஷ்டை, சங்கல்பம், வாஸ்து சாந்தி, யாகசாலை பிரவேசம், முதல் கால ஹோம பூஜை, மகா தீபம், தீபாராதனை, இரவு திருப்பதி ஏழுமலையான் வெங்கடேஸ்வர சாமிக்கு மருந்து சாற்றுதல் நிகழ்ச்சி நடந்தது. நேற்று அதிகாலை, 5:00 மணிக்கு திருப்பல்லாண்டு, திருப்பள்ளி எழுச்சி, திருப்பாவை, திவ்ய பிரபந்தம் பாராயணம், வெங்கடேச பெருமாள் பிரதிஷ்டை, தொடர் அலங்கார பூஜைகள், மதியம் அன்னதானம் நடந்தது. நிகழ்ச்சிக்கான ஏற்பாடுகளை திருவிழா கமிட்டி குழு மற்றும் ஊர் பொதுமக்கள் செய்து இருந்தனர்.