காரியாபட்டி; காரியாபட்டி முடுக்கன்குளம் சிவன் கோயிலில் சுற்றுச்சுவர் சேதமடைந்துள்ளது. பக்தர்கள் வேதனையடைந்துள்ளனர்.

காரியாபட்டி முடுக்கன்குளத்தில் ராவணனை கரம் பிடிக்க மண்டோதரி தவமிருந்த புண்ணிய ஸ்தலம். இத்தலத்தில் வேண்டிக் கொண்டதால் ராவணனுடன் திருமணம் முடிந்ததாக நம்பப்படுகிறது. திருமணம் ஆகாதவர்கள் இத்தலத்தில் வேண்டிக் கொண்டால் விரைவில் திருமணமாகும் என்பது நம்பிக்கை. இக்கோயில் போதிய பராமரிப்பு இல்லாததால் சிதிலமடைந்து கூரை உடைந்து காணப்படுகிறது. பிரதோஷம், அமாவாசை, சிவராத்திரி என அடிக்கடி சிறப்பு பூஜைகள் நடைபெறும். பெரும்பாலானவர்கள் இக்கோயிலில் திருமணம் செய்வர். அடிப்படை வசதிகள் முற்றிலும் கிடையாது. கட்டடத்தின் கற்கள் விழுந்துள்ளன. சுற்றுச்சுவர் சேதமடைந்து இடிந்து விழுந்து உள்ளன. தற்போது மழை பெய்து வருவதால் மழைக்கு தாக்கு பிடிக்காமல் மீதமுள்ள சுற்றுச்சுவரும் இடியும் ஆபத்தான நிலை உள்ளது. மழைக்காலத்தில் மழை நீர் தேங்கி கிடக்கிறது. சுவாமி தரிசனம் செய்ய செல்லும் பக்தர்கள் படாதபாடு படுகின்றனர். அச்சத்துடன் சுவாமி தரிசனம் செய்கின்றனர். மேலும் இடிந்து விபத்து ஏற்படுவதற்கு முன் சுற்றுச் சுவரை சீரமைக்க நடவடிக்கை எடுக்க வேண்டும் என பக்தர்கள் எதிர்பார்க்கின்றனர்.