உடுமலை: உடுமலை அருகே, திருமூர்த்திமலை பஞ்சலிங்கம் அருவியில் வெள்ளப்பெருக்கு ஏற்பட்டுள்ளதால், பக்தர்கள், சுற்றுலா பயணியர் செல்ல தடை விதிக்கப்பட்டுள்ளது.

திருப்பூர் மாவட்டம், உடுமலை திருமூர்த்திமலை சுற்றுலா மற்றும் ஆன்மிக மையமாக உள்ளது. பல்வேறு மாவட்டங்களிலிருந்து ஏராளமான சுற்றுலா பயணியர், பொதுமக்கள் வந்து செல்கின்றனர். தற்போது சபரிமலை சீசன் துவங்கியுள்ளதால், ஐயப்ப  பக்தர்கள் ஏராளமானவர்கள் வந்து செல்கின்றனர். திருமூர்த்திமலை பகுதியில் இன்று கனமழை  பெய்ததால் பஞ்சலிங்கம் அருவியில் வெள்ளப்பெருக்கு ஏற்பட்டுள்ளது. இதனால், பாதுகாப்பு கருதி சுற்றுலா பயணியர், பக்தர்கள் அருவிக்கு செல்ல தடை விதிக்கப்பட்டுள்ளது. மலையடிவாரத்தில், தோணியாற்றின் கரையில் அமைந்துள்ள அமணலிங்கேஸ்வரர் கோவிலில், வழக்கமான பூஜைகள் மற்றும் பக்தர்கள் சுவாமி தரிசனம் செய்ய அனுமதிக்கப்பட்டது. கோவில் ஊழியர்கள் கண்காணிப்பு மற்றும் பாதுகாப்பு பணியில் ஈடுபட்டுள்ளனர்.