பெலகாவி: தென்மேற்கு பருவமழை தாமதமாவதால், ஹிடகல் அணையில் நீர்மட்டம் குறைந்துள்ளது. இதனால் புராதன கோவில் தரிசனம் அளிக்கிறது.

பெலகாவி மாவட்டம், ஹுக்கேரி தாலுகாவின், ஹுன்னுாரு கிராமத்தில் 1928ல் விட்டலர் கோவில் கட்டப்பட்டது.

கடந்த 1978ல் ஹிடகல் அணை கட்டி தண்ணீர் நிரம்பிய பின், இக்கோவில் முழுதும் நீரில் மூழ்கியது. அணை கட்டிய நாளில் இருந்து, இதுவரை இரண்டு முறை மட்டுமே, கோவில் வெளி உலகத்துக்கு தெரிந்தது.

கடந்த 2023ல் மழை பற்றாக்குறையால், வறட்சி நிலவிய போது, அணையில் நீர்மட்டம் குறைந்து முதல் முறையாக கோவில் வெளியில் தெரிந்தது. நீரில் மூழ்கி 48 ஆண்டுகளுக்கு பின், விட்டலர் கோவிலை பக்தர்கள் தரிசித்தனர்.

நடப்பாண்டு மழை தாமதமாவதால், அணையில் நீர்மட்டம் குறைந்து, இரண்டாவது முறையாக கோவில் தென்படுகிறது. இத்தனை ஆண்டுகளாக நீரில் மூழ்கியிருந்தும் கோவில் கட்டடம், கம்பங்கள் மற்றும் கோபுரத்துக்கு எந்த பாதிப்பும் ஏற்படவில்லை.

குறிப்பாக கரிசல் மண்ணால் தயாரிக்கப்பட்ட விட்டலர் விக்ரகம், இவ்வளவு ஆண்டுகள் நீரில் இருந்தும் கரையாமல், நல்ல நிலையில் இருப்பது ஆச்சரியமான விஷயமாகும். அணை வறண்டிருப்பது விவசாயிகளுக்கு வருத்தமாக இருந்தாலும், கோவில் வெளியில் தெரிவதால் மகிழ்கின்றனர்.

விட்டலரை தரிசிக்க சுற்றுப்புற கிராமத்தினர் மட்டுமின்றி, மஹாராஷ்டிராவில் இருந்தும் பெருமளவில் பக்தர்கள் வருகின்றனர்.