திருவள்ளூர்: திருநின்றவூர் இருதயாலீஸ்வரர் கோவிலுக்கு சொந்தமான, 25 கோடி ரூபாய் மதிப்பிலான நிலத்தை, போலி ஆவணங்கள் தயாரித்து குத்தகைக்குவிட, மர்ம நபர்கள் முயற்சி செய்தது அதிர்ச்சியை ஏற்படுத்தி உள்ளது. அதிகாரிகளின் கையெழுத்தை அக்கும்பல் போலியாக போட்டு மோசடிக்கு முயன்றுள்ளது. கிராம மக்கள் உஷார்படுத்தியதால் விழிப்படைந்த கோவில் நிர்வாகம், போலீசில் புகார் அளித்துள்ளது.

திருவள்ளூர் மாவட்டம், திருநின்றவூர், சிவன் கோவில் தெருவில், 1,300 ஆண்டுகள் பழமை வாய்ந்த மரகதாம்பாள் சமேத ஸ்ரீ இருதயாலீஸ்வரர் கோவில் உள்ளது. ஹிந்து சமய அறநிலையத்துறையின் கட்டுப்பாட்டில் உள்ள இந்த கோவிலில் திருப்பணிகள் முடிந்த நிலையில், ஜனவரியில் கும்பாபிஷேகம் நடந்தது. திருநின்றவூர் சரத் கண்டிகை மற்றும் கொசவன்பாளையம் பகுதிகளில் கோவிலுக்கு சொந்தமாக, 5 ஏக்கர் நிலங்கள் உள்ளன.இதில், சரத் கண்டிகை பகுதியில் உள்ள நிலம் கோவில் நிர்வாகத்தில் முறையாக அனுமதி பெற்று, குத்தகைக்கு விடப்பட்டுள்ளது.

இந்நிலையில், அதிகாரிகளின் கையெழுத்தை போலியாக போட்டு, போலி ஆவணங்கள் தயாரித்து, கொசவன் பாளையத்தில் உள்ள, 25 கோடி ரூபாய் மதிப்பிலான கோவில் நிலத்தை குத்தகைக்கு விட்டுள்ளதாக, அப்பகுதி மக்கள், கோவில் நிர்வாகத்திற்கு புகார் அளித்தனர். இதையடுத்து, திருநின்றவூரை சேர்ந்த ஜெயக்குமார், அஸ்வின் குமார், தேவநாதன் உள்ளிட்ட சிலர், கோவில் நிலங்களை போலி ஆவணங்கள் தயாரித்து, குத்தகைக்குவிட முயற்சிப்பதாவும், அவர்கள் மீது நடவடிக்கை எடுக்க வேண்டும் என, ஹிந்து சமய அறநிலையத்துறை செயல் அலுவலர் சிந்துமதி, திருநின்றவூர் காவல் நிலையத்தில் புகார் அளித்தார். புகாரின்படி, திருநின்றவூர் போலீசார் ஜெயக்குமார், அஸ்வின் குமார், தேவநாதன் உள்ளிட்டோரை விசாரித்தபோது, சசிகுமார் என்பவர் அரசு அதிகாரிகள் கையெழுத்தை போலியாக போட்டு, போலியான ஆவணங்கள் தயார் செய்தது தெரிந்தது.

திருநின்றவூர் போலீசார், சசிகுமாருக்கு சம்மன் அனுப்பி விசாரிக்க முடிவு செய்துள்ளனர்.

இதுகுறித்து, கோவில் நிர்வாகிகள் கூறியதாவது: தற்போதுவரை கோவில் நிலங்கள் எங்கள் கட்டுப்பாட்டில்தான் உள்ளன. நிலத்தை யாரும் ஆக்கிரமிக்கவில்லை. ஆனால், கோவில் நிலத்தை குத்தகைக்குவிட, சிலர் முயற்சி செய்ததாக புகார் எழுந்துள்ளது. இதில், யாரேனும் பயன் அடைந்துள்ளனரா என்பது குறித்து, போலீசார் விசாரித்து வருகின்றனர். இவ்வாறு அவர்கள் கூறினர்.