திருக்கோவிலூர்: பகவான் யோகி ராம்சுரத்குமார் குரு மகராஜின் 12ம் ஆண்டு ஆராதனை விழாவின் முதல்நாள் ஹோமங்கள் நேற்று நடந்தது. திருவண்ணாமலையில், பகவான் ஆசிரம வளாகத்தில், குரு மகராஜின் 12ம் ஆண்டு ஆராதனை விழாவின் முதல் நாள் நிகழ்ச்சி நேற்று நடந்தது. காலை 6:30 மணிக்கு கணபதி பூஜை, அனுக்ஞை, கணபதி ஹோமம், ஆவகந்தி ஹோமம், ஆயுஷ் ஹோமம், அதிஷ்டானத்தில் சிறப்பு அபிஷேகம், அலங்காரம், மகா தீபாராதனை, வேதவிற்பனர்களின் நான்கு வேத பாராயணம் நடந்தது. முற்பகல் 11:00 மணிக்கு, பக்தர்கள் பகவானுடன் ஏற்பட்ட அனுபவங்களை பகிர்ந்துக் கொண்டனர். மாலை 4:00 மணிக்கு சற்குருநாதன் ஓதுவாரின் தேவாரம், திருவாசகம் மற்றும் "கீதையின் வழியும் யோகியின் மொழியும் என்ற தலைப்பில் புதுச்சேரி ஜோசப் சொற்பொழிவு நடந்தது. இரண்டாம் நாளான இன்று காலை 6:30 மணிக்கு மகன்யாசம், ஏகாதர ருத்ரம், அதிஷ்டானத்தில் சிறப்பு அபிஷேகம், அர்ச்சனை, பூஜைகளும் நடந்தது. காலை 9:00 மணிக்கு தபோவனம் பூஜ்ய ஸ்ரீ நித்யானந்தகிரி சுவாமிகள் முன்னிலையில், தீர்த்த நாராயண பூஜை, 11:00 மணிக்கு பஜனை நடக்கிறது. தொடர்ந்து ஆசிரம நிர்வாகி ஜஸ்டிஸ் டி.எஸ்.அருணாசலத்துடன் கருத்து பரிமாற்ற நிகழ்ச்சி, மாலை 6:00 மணிக்கு, இன்னிசை கச்சேரியும், இரவு 8 : 00 மணிக்கு பகவானின் உற்சவ மூத்தியுடன் வெள்ளி ரத ஊர்வலம் நடக்கிறது.