சென்னிமலை: சென்னிமலை முருகன் கோவில் பங்குனி உத்திர தேர்த்திருவிழா நேற்று கொடியேற்றத்துடன் துவங்கியது. மலை மீது சேவல் கொடியேற்றி விழாவை துவக்கி வைத்தனர். மலைகளில் தலையாய மலையாக போற்றப்படும் சென்னிமலை கடல் மட்டத்தில் இருந்து, 1,749 அடி உயரத்தில் உள்ளது. இங்கு மலை மீது குமரக் கடவுள் பாலதண்டாயுதமூர்த்தம் (சுப்பிரமணிய சுவாமி) கொண்டு அருள்பாலித்து வருகிறார். இங்கு தினமும் படி வழியாக முருகப்பெருமானுக்கு எருதுகள் மூலம் திருமஞ்சனம் (தீர்த்த குடம்) கொண்டு செல்வது தனிச்சிறப்பு. இங்கு முருகப்பெருமானுக்கு தைப்பூச தேர், பங்குனி உத்திரத்தேர் என தனித்தனியாக இரண்டு பெரிய தேர் உள்ளது. இங்கு ஆண்டு தோறும் பங்குனி உத்திர தேரோட்டம் வெகு சிறப்பாக நடந்து வருகிறது. இந்தாண்டு பங்குனி உத்திர விழா நேற்று வழக்கப்படி சென்னிமலை இசை வேளாளர்கள் சமூகத்தை சேர்ந்த நாட்டமை, பெரியதனகாரர்கள், பெரியவர்கள் முன் நின்று மலை மேல் உயரத்தில் உள்ள கொடிமரத்தில் சேவல் கொடியை ஏற்றி உத்திர விழாவை துவக்கி வைத்தனர். கொடியேற்றத்துக்கு முன் முருகன், வள்ளி, தெய்வானை, உற்சவ மூர்த்திகளுக்கும். மூலவர்க்கும் சிறப்பு அபிஷேகம், தீபாரதனை நடந்தது. தலைமை குருக்கள் ராமநாதசிவம் கொடி மரத்துக்கு சிறப்பு பூஜை செய்ய, சென்னிமலை இசை வேளாளர்கள் சமூகத்தினர் குலக்கட்டளைபடி சேவல் கொடியை ஏற்றி விழாவை முறைப்படி துவக்கி வைத்தனர். செயல் அலுவலர் தனபாலன், காவேரிரங்கன், இந்திரா டெக்ஸ் மேலாளர் சுகுமார்ரவி, போலீஸ் எஸ்.ஐ., தாமஸ், ஏட்டு ஜீவானந்தம் உட்பட பலர் பங்கேற்றனர். முருகப்பெருமானுக்கு திருக்கல்யாணம் இன்று (26ம் தேதி) இரவு நடக்கிறது. தேரோட்டம் நாளை (27ம் தேதி) காலை, 6.30 மணிக்கு நடக்கிறது. மாலை, 5 மணிக்கு தேர் நிலை சேரும். 28ம் தேதி காலை பரிவேட்டை நிகழ்ச்சியும், இரவு தெப்பத்தேர் உற்சவம் நடக்கிறது. 29ம் தேதி காலை மகாதரிசனம் நடக்கிறது. இரவு மஞ்சள் நீர் நிகழ்ச்சியுடன் பங்குனி உத்திர விழா நிறைவு பெறுகிறது. ஏற்பாடுகளை தக்கார் வில்வமூர்த்தி, செயல் அலுவலர் பசவராஜன் ஆகியோர் செய்கின்றனர்.