பாட்னா: பீகாரின் புத்தகயாவில் உள்ள, மகாபோதி கோவில் விதானத்தை, தங்கத் தகடால் மூடும் பணிக்காக, 300 கிலோ தங்கம், கோவில் வளாகத்தில் வந்திறங்கியுள்ளது. அதை, தாய்லாந்தின் கமாண்டோ படை வீரர்கள், 24 பேர், இரவும், பகலும், இயந்திர துப்பாக்கி சகிதமாக, பாதுகாத்து வருகின்றனர். மகாபுத்தர், இந்தியாவில் பிறந்தவர். அவர், ஞானோதயம் அடைந்த இடம், பீகார் தலைநகர், பாட்னா அருகே உள்ள புத்தகயா என்ற இடத்தில் உள்ளது. போதி மரத்தின் கீழ் அமர்ந்து, புத்தர் ஞானம் பெற்றதால், அந்த இடம், மகாபோதி என, அழைக்கப்படுகிறது. இங்கு, கி.பி., 5ம் நூற்றாண்டில், பிரமாண்ட கோவில் கட்டப்பட்டது. உலகம் முழுவதும் இருந்து, ஏராளமான புத்தமதத்தினர், மகாபோதி கோவிலுக்கு வந்து, புத்தபிரானை வழிபட்டுச் செல்கின்றனர். தாய்லாந்து நாட்டில், பெரும்பாலானோர், புத்தமதத்தையே பின்பற்றுகின்றனர். அந்த நாட்டின் மன்னர், பூமிபோல் அதுல்யா, கடந்த ஆண்டு, மகாபோதி கோவிலுக்கு வந்திருந்த போது, அதன் பிரமாண்ட விதானங்களை, தங்கத் தகடால் மூடப் போவதாக அறிவித்திருந்தார். கோவிலை நிர்வகிக்கும், மத்திய அரசின் தொல்பொருள் ஆய்வுத்துறையிடம், அதற்கான அனுமதியை, தாய்லாந்து அரசு பெற்றுள்ளது. இதையடுத்து, தங்கத்தகடுகள் பொருத்தும் பணி, நாளை மறுநாள் துவங்குகிறது.