ராமேஸ்வரம்: ராமேஸ்வரம் ராமநாதசுவாமி கோயிலில், ராமலிங்க பிரதிஷ்டை விழாவையொட்டி, ஜூன் 7 ல், காலை 7:00 மணிக்கு கோயில் நடை மூடப்படுகிறது. அன்று காலை பக்தர்கள் கோயில் தீர்த்தங்களில் புனித நீராட முடியாது. ராமேஸ்வரம் கோயில் இணை கமிஷனர் சி.செல்வராஜ் கூறியதாவது: இக்கோயிலில், ராமலிங்க பிரதிஷ்டை விழாவையொட்டி, ஜூன் 6 ல், ராமர் பல்லக்கில் புறப்பட்டு, ராவணனை சூரசம்ஹாரம் செய்தல் நிகழ்ச்சி நடைபெறுகிறது. மறுநாள் (ஜூன் 7) அதிகாலை 3:00 மணிக்கு, கோயில் நடை திறக்கப்பட்டதும், 4:00 மணிக்கு ஸ்படிகலிங்க பூஜை, கால பூஜை நடக்கிறது. அதன்பின், ராமநாதசுவாமி கோயிலில் இருந்து, காலை 7:00 மணிக்கு ராமர் புறப்பாடாகி, கோதண்டராமர் கோயில் செல்கிறார். அதைத்தொடர்ந்து, கோயில் நடை மூடப்படும். கோதண்டராமர் கோயிலில், விபீஷணருக்கு ராமர் பட்டாபிஷேகம் சூட்டுகிறார். மீண்டும், கோதண்டராமர் கோயிலில் இருந்து புறப்பட்டு, மாலையில், ராமநாதசுவாமி கோயிலுக்கு வருகிறார். அதன்பின், மாலை 4:00 மணிக்கு நடை திறக்கப்படும். எனவே, ஜூன் 7 காலையில், கோயிலில் புனித நீராடி, தரிசனம் செய்வதை பக்தர்கள் தவிர்க்க வேண்டும். அன்று மாலையில் புனித தீர்த்தங்களில் நீராடி, சுவாமி தரிசனம் செய்யலாம். ஜூன் 8 ல், கோயிலில் ராமலிங்க பிரதிஷ்டை விழா நடைபெறுகிறது, என்றார்.