ராமநாதபுரம்: ராமநாதபுரத்தில், ஒரே பரம்பரையை சேர்ந்த 80 குடும்பத்தினர், 139 ஆடுகள் வெட்டி, நேர்த்திக் கடன் செலுத்தினர். இதில், 5,000த்திற்கும் மேற்பட்டவர்கள் பங்கேற்றனர்.ராமநாதபுரத்தில், கூரிசாத்த அய்யனார் கோவில் உள்ளது. இக்கோவிலை குலதெய்வமாக கொண்ட ஒரே பரம்பரையினர், சிவகங்கை மாவட்டம் பஞ்சலூர், கல்லடி திடல், உதயனூர், வடவிருக்கை, அரியாங்கோட்டை, நானாமடை, ஏந்தல் ஆகிய கிராமங்களில் உள்ளனர்.இந்த, 80 குடும்பத்தினரில், 750க்கும் மேற்பட்ட உறுப்பினர்கள் உள்ளனர். இவர்கள், 200 ஆண்டுகளுக்கு முன்பிருந்து, கூரிசாத்த அய்யனார் கோவிலில் பொங்கல் வைத்து, ஆடு வெட்டி நேர்த்திக்கடன் செலுத்தி வருகின்றனர். நேற்று முன்தினம் நடந்த விழாவில், மாலை முதல் நள்ளிரவு வரை, 139 ஆடுகள் வெட்டி, நேர்த்திக்கடன் செலுத்தினர். இதில், 5,000த்துக்கும் மேற்பட்ட உறவினர்கள் பங்கேற்றனர்.கல்லடி திடல் தலைமை பூசாரி சின்னதம்பி கூறுகையில், "நேர்த்திகடன் செலுத்தி வெட்டும் ஆடுகளை, 80 பங்குகள் வைத்து, பங்காளிகள் ஆளுக்கு ஒன்றாக பிரித்து, சமைத்து சாப்பிடுவர். இதில் தான் அவர்களின் ஒற்றுமை விளங்கும். மூன்று ஆண்டிற்கு ஒரு முறை, இந்த விழா நடக்கிறது என்றார்.