நீங்கள் பலமுறை சபரிமலை ஐயப்பன் கோவிலுக்கு சென்று வந்திருப்பீர்கள். வரும்போது எல்லாரும் வரிசையில் நின்று வாங்கும் பிரசாதம் அரவணை. இது பாயாசம் போல இருக்கும். இதற்கு அரவணை என்று பெயர் வர என்ன காரணம் தெரியுமா?

தாருகாவனம் என்ற இடத்தில் வசித்த தவமுனிவர்கள், தாங்கள் செய்யும் யாகத்தில் இருந்து பெறும் ஆகுதியை (ஹோமகுண்டத்தில் போடும் பொருள்)கொண்டு தான் சிவ, விஷ்ணு மற்றும் தேவர்கள் உயிர் வாழ்வதாக கருதினர். இதனால் தெய்வங்களை விட தாங்களே உயர்ந்தவர்கள் என்று இறுமாப்பு கொண்டனர். இவர்களது ஆணவத்தை அடக்க சிவனும், விஷ்ணுவும் முடிவெடுத்தனர். சிவனே முழுமுதல் தெய்வம், விஷ்ணுவே உலகைக் காக்கும் தொழில் செய்பவர் என்பதை அவர்களுக்கு உணர்த்த விரும்பினர். சிவன் அழகான வடிவம் எடுத்தும், விஷ்ணு பெண்ணாக மாறி மோகினி என்ற பெயருடனும் வனத்துக்கு வந்தார். அழகான சிவனைக் கண்ட முனிவர்களின் மனைவியருக்கு மனம் மயங்கியது. அவர்கள் சிவன் பின்னால் சென்றனர். முனிவர்களோ விஷ்ணுவின் மாயக்கோலத்தை அறியாமல், மோகினியாக வடிவெடுத்து வந்த அவர் பின்னால் சென்றனர். ஒருவழியாக சுதாரித்து, தங்கள் துணைவியரைக் காப்பாற்றுவதற்காக சிவனை சரணடைந்தனர். சிவனும் அவர்களுக்கு அருள்பாலித்தார்.
இதன்பின், உலக நன்மை கருதி சிவனும், விஷ்ணுவான மோகினியும் இணைந்து பெற்ற குழந்தையே சாஸ்தா. இவரை தமிழில் சாத்தன் என்பர். சாத்தன் என்றால் கூட்டமாக வந்து வணங்கப்படும் தெய்வம் என்று பொருள். சாஸ்தா பிறந்ததே காட்டில் தான். அவர் குழந்தைப் பருவம் முதல் வானப்பிரஸ்தம் எனப்படும் தவவாழ்வுக்கு சென்ற காலம் வரை காட்டிலேயே பொழுதைக் கழித்தார்.

சாதாரண மனிதர்கள் தனித்து காட்டுக்குச் செல்வது என்பது மிகவும் கடினம். எனவே கூட்டமாக சேர்ந்து காட்டிற்கு சென்று சாஸ்தாவை தரிசித்தனர். சாஸ்தாவின் ஒரு அவதாரமே ஐயப்பன். அவரை வணங்க இன்றுவரை கூட்டமாகத் தான் சென்று கொண்டிருக்கிறார்கள். சாஸ்தா கோவில்கள் நதிக்கரை ஓரமாக உள்ளதும் ஒரு சிறப்பு. சபரிமலை சாஸ்தா பம்பை நதிக்கரை ஓரத்திலும், ஆரியங்காவு சாஸ்தா கருப்பா நதிக்கரை ஓரத்திலும், பாபநாசம் சொரிமுத்தைய்யனார் தாமிரபரணி கரை ஓரத்திலும் உள்ளது குறிப்பிடத்தக்கது. கிராமங்களில் குளக்கரைகளில் இவரைக் காணலாம். சபரிமலை சாஸ்தா கோவிலில் அரவணை என்ற பாயாச பிரசாதம் வழங்கப்படுகிறது. அரவு என்றால் பாம்பு. அணை என்றால் படுக்கை. சிவனின் கழுத்தில் இருப்பது பாம்பு. அதுவே திருமாலுக்கு படுக்கையாக ஆதிசேஷன் என்ற பெயரில் இருக்கிறது. சிவவிஷ்ணு கூட்டணியில் அவதரித்ததாலோ என்னவோ, சாஸ்தாவின் பிரசாதத்துக்கு கூட அந்தப் பெயரை சூட்டியிருக்கிறார்கள். புராணக்கதை ஒன்றும் சாஸ்தாவுக்கு பிரியமான நைவேத்யம் பாயாசம் என்று சொல்கிறது. தசரதருக்கு குழந்தைகள் இல்லாத சமயத்தில் புத்திர காமேஷ்டி யாகம் செய்தார். யாக குண்டத்தில் இருந்து ஒரு பூதம் வெளிப்பட்டது.

பூதம் என்ற சொல் சாஸ்தாவுடன் தொடர்புடையது. அவருக்கு பூதநாதன், பூதத்தான் என்றெல்லாம் பெயர்கள் உண்டு. தன் குழந்தையான பூதநாதன் மூலம் திருமால் பூலோகத்தில் அவதரிக்க முடிவு செய்தார். வால்மீகி ராமாயணத்தின் பாலகாண்டத்தில் 11-16ம் ஸ்லோகங்களின் பொருள்படி, ஒப்பில்லாத ஒளியையுடைய, மகாவீர்யம் பொருந்திய, அழகான ஆபரணங்களால் அழகு செய்யப்பட்ட பூதம் தோன்றியது என்று சொல்லப்பட்டுள்ளது. ஒப்பில்லாத ஒளியையே மகரஜோதி என்கிறோம். அவர் பெரும் சக்தி மிக்கவர். அவருக்கு இன்றும் திருவாபரணம் அணிந்து மண்டலபூஜை செய்யப்படுகிறது. ஸ்ரீஅரிகர புத்ர சகஸ்ரநாமம், ஸ்ரீ மகா சாஸ்த்ரு த்ரீசதி, அஷ்டோத்தர சதம் ஆகியவற்றிலும் ஒளிபொருந்தியவர், மகாசக்தி மிக்கவர், ஆபரணம் அணிந்தவர் உள்ளிட்ட வார்த்தைகள் வருகின்றன. பூதநாதனான சாஸ்தா கொண்டு வந்த மாணிக்கப் பாத்திரத்தில் இருந்த பாயாசத்தைக் குடித்த கோசலை ராமனையும், கைகேயி பரதனையும், இரு பங்கு பாயாசம் குடித்த சுமித்திரை லட்சுமணன் மற்றும் சத்ருக்கனனையும் ஈன்றெடுத்தனர். சாஸ்தா அவதரித்த நாள் பங்குனி உத்திரம். அவர் கொண்டு வந்த பாயாசப் பாத்திரத்தின் மூலம் பிறந்த ராமசகோதரர்கள் திருமணம் முடித்ததும் பங்குனி உத்திரத்தன்று தான். ராமன் சீதையையும், லட்சுமணன் ஊர்மிளாவையும், பரதன் மாண்டவியையும், சத்ருக்கனன் சுருதகீர்த்தியையும் திருமணம் செய்தனர். இந்தப் பெண்கள் எல்லாருமே ஜனகர் குடும்பத்தைச் சேர்ந்தவர்கள். ஆக, குழந்தை வரம் வேண்டுவோர் சாஸ்தாவை நம்பிக்கையுடன் வணங்கலாம். அவருக்கு சரஸ்வதியின் அம்சமான பிரபா என்ற மனைவியும், சத்யகன் என்ற மகன் இருந்ததாகவும் சில்பரத்தினம் என்ற நுõலில் தெரிவிக்கப் பட்டுள்ளது. குழந்தை வரம் தரும் இந்த சாஸ்தாவை சம்மோஹன சாஸ்தா என்பர். பங்குனி உத்திரத்தன்று சாஸ்தாவை வணங்கி நல்வாழ்வு பெறுவோம்.