ஆண் தெய்வங்களில் பிரம்மாவுக்கு நான்கு முகம். பெண் தெய்வங்களில் நான்கு முகம் கொண்ட அம்பிகை சிதம்பரம் தில்லைக்காளி கோவிலில் அருளுகிறாள்.

இவளை பிரம்ம சாமுண்டீஸ்வரி என்பர். சிவனுக்கும், அம்பாளுக்கும் நடந்த நடனப்போட்டியில், சிவன் ஊர்த்துவ தாண்டவர் என்ற பெயரில், உக்கிர தாண்டவம் ஆடினார். ஒரு கட்டத்தில் தன் காலைத் தலையில் துாக்கி வைத்து ஆடிய சிவன், இவ்வாறே காளியால் செய்ய முடியுமா என கேட்க, பெண்மைக்குரிய நாணம் உந்தித்தள்ள காளியால் முடியாமல் போனது. இதையடுத்து அவளுக்கு வருத்தம் ஏற்பட்டது. அவளது வருத்தத்தைப் போக்கும் வகையில், பிரம்மா அவளை வேதநாயகி எனப்புகழ்ந்து பாடி, நான்கு வேதங்களைக் குறிக்கும் வகையில், நான்கு முகங்களுடன் அருளுமாறு வேண்டினார். அதன்படி காளி, பிரம்ம சாமுண்டீஸ்வரி என்ற பெயரில் நான்கு முகத்துடன் காட்சி தந்தாள். இவளுக்கு தனி சிலை உள்ளது. பிரம்ம சாமுண்டீஸ்வரிக்கு "தில்லையம்மன் என்ற பெயரும் உண்டு. இவள் மேற்கு நோக்கி சாந்த சொரூபிணியாக அருளுகிறாள்.