கோத்தகிரி : கோத்தகிரி மாரியம்மன் திருவிழா மறுபூஜையை ஒட்டி, நேற்று நடந்த தீர்த்தக்குடம் ஊர்வலத்தில் திரளா பக்தர்கள் பங்கேற்றனர். கோத்தகிரி கடைவீதி மாரியம்மன் திருவிழா, 24ம் தேதி கொடியேற்றத்துடன் துவங்கியது. விழாவின் இறுதி நாளான நேற்று, காலை, 10:00 மணிக்கு கடைவீதி ஓம் சித்தி விநாயகர் திருக்கோவிலில் இருந்து பல புண்ணிய ஸ்தலங்களில், சேகரிக்கப்பட்ட தீர்த்த குடங்கள், திருவீதி உலா ஊர்வலம், ரோஸ் காட்டேஜ், காம்பாய் கடை, பஸ்நிலையம் மற்றும் கடைவீதி வழியாக, கோவிலை அடைந்தது. தாரை தப்பட்டை முழங்க, தீச்சட்டியுடன், திரளான பெண்கள் ஊர்வலத்தில் பங்கேற்றனர். பகல், 12:00 மணிக்கு, அம்மனுக்கு தீர்த்த அபிஷேகம் வழிபாடு நிகழ்ச்சியை அடுத்து, அம்மனுக்கு மறுபூஜை நடந்தது. இதேபோல கோத்தகிரியின் புறநகர் பகுதிகளில் உள்ள மாரியம்மன் கோவில்களில் திருவிழா நடந்து வருகிறது. இவற்றில் பக்தர்கள் தங்கள் நேர்த்திக்கடன்களை செலுத்தி வருகின்றனர்.