ஓசூர்: ஓசூர் ராமநாயக்கன் ஏரிக்குள் அமைந்துள்ள துக்களம்மன் கோவில் திருவிழா நேற்று நடந்தது. இதில், இரு செம்மறி ஆடுகள் பலிகொடுக்கப்பட்டு நேர்த்திக்கடன் செலுத்தப்பட்டது. ஓசூர் ராமநாயக்கன் ஏரிக்குள் துக்களம்மன் கோவில் உள்ளது. மிகவும் சக்தி வாய்ந்த தெய்வமாக கருதப்படும் துக்களம்மன் தான், ஓசூரில் மழை பொழிய வைத்து செழிக்க வைக்கிறார் என, பக்தர்கள் மத்தியில் நம்பிக்கை உள்ளது. இதனால் துக்களம்மனுக்கு கடந்த மாதம் சிறப்பு பூஜை நடத்தப்பட்டது. இதைத்தொடர்ந்து, நேற்று துக்களம்மன் கோவில் திருவிழா நடந்தது. இதில் முன்னாள் எம்.எல்.ஏ., மனோகரன் தலைமையில், மழை வேண்டியும், விவசாயம் செழிக்கவும், மக்கள் நலமுடன் வாழவும், நேற்று காலை, 8:30 மணிக்கு, கணபதி ஹோமம், நவக்கிரக ஹோமம், மகாலட்சுமி ஹோமம், துர்க்கை ஹோமம் நடந்தது. அதைத்தொடர்ந்து கலசாபிஷேகம் செய்யப்பட்டு, அம்மனுக்கு சிறப்பு பூஜை செய்யப்பட்டது. பின் இரு செம்மறி ஆடுகள் பலிகொடுக்கப்பட்டு நேர்த்திக்கடன் செலுத்தப்பட்டது. இதில் திரளான பக்தர்கள் பங்கேற்று சுவாமி தரிசனம் செய்தனர்.