தஞ்சாவூர்: திட்டை வசிஷ்டேஸ்வரர் கோவிலில் இன்று சனிப்பெயர்ச்சி விழா நடக்கிறது. நவகிரகங்களில் முக்கிய கிரகமான சனிபகவான் ஈஸ்வரப் பட்டம் பெற்று சனீஸ்வரன் என்றழைக்கப்படுகிறார். இந்த சனி பகவான் இரண்டரை ஆண்டுகளுக்கு ஒரு முறை ஒரு ராசியிலிருந்து, மற்றோரு ராசிக்கு பெயர்ச்சி அடைவதை சனிப்பெயர்ச்சி விழாவாக கோவில்களில் கொண்டாப்படுகிறது.இவ்வாண்டில் இன்று 21ம் தேதி காலை 7.24 மணிக்கு கன்னி ராசியில் இருந்து துலாம் ராசிக்கு பெயர்ச்சி அடைகிறார். இந்த சனிப்பெயர்ச்சியை முன்னிட்டு திட்டை வசிஷ்டேஸ்வரர் கோவிலில் சிறப்பு அர்ச்சனைகளும் பரிகார ஹோமங்களும் நடக்கிறது. மேஷம், கடகம், கன்னி, துலாம், விருச்சிகம், மகரம், மீனம் ஆகிய ராசிதாரர்கள் பரிகாரம் செய்து கொள்வது முக்கியம். சிறப்பு அர்ச்சனை காலை எட்டு மணி முதல் மதியம் இரண்டு மணி வரையும், மாலை ஐந்து மணி முதல் இரவு எட்டு மணி வரை இன்று 21ம் தேதி ஒரு நாள் மட்டுமே நடக்கின்றது. நேரில் வருபவர்கள் கட்டணம் செலுத்தி சிறப்பு அர்ச்னை மற்றும் பரிகார ஹோமங்களில் பங்கு பெறலாம். நேரில் வர முடியாதவர்கள் கட்டணம் செலுத்தி பதிவு செய்து கொண்டால் பரிகாரம் செய்து தபால் மூலம் பிரசாதமாக அனுப்பி வைக்கப்படும். சிறப்பு அர்ச்சனைக்கு ரூபாய் 50, பரிகார ஹோமத்துக்கு ரூபாய் 250 மணி ஆர்டர் அல்லது டிமாண்ட் டிராப்ட் எடுத்து தஞ்சையில் மாற்றத்தக்க வகையில், நிர்வாக அதிகாரி, அருள்மிகு வசிஷ்டேஸ்வரர் திருக்கோவில், திட்டை, தஞ்சை மாவட்டம் 613003 என்ற முகவரிக்கு, தங்கள் பெயர், நட்சத்திரம், ராசி ஆகிய விபரங்களை சரியான முகவரியுடன் அனுப்பினால், அவர்களுக்கு அர்ச்சனை பரிகார ஹோமத்தில் சங்கல்பம் செய்து தபால் மூலம் பிரசாம் அனுப்பி வைக்கப்படும். சனிப்பெயர்ச்சி விழாவுக்கான ஏற்பாடுகளை செயல் அலுவலர் கோவிந்தராஜு, தக்கார் ஜெயபால் மற்றும் கோவில் பணியாளர்கள், கிராமத்தினர் செய்து வருகின்றனர்.