புதுக்கோட்டை: ஆலங்குடி அருகே, பில்லி சோறு எறியும் வினோத திருவிழா, நேற்று நடந்தது. புதுக்கோட்டை மாவட்டம், ஆலங்குடி அருகே, வாராப்பூர், பூர்ணகலாம்பிகை, புஷ்பகலாம்பிகை சமேத பெரிய அய்யனார், பாலையடி கருப்பண்ண சுவாமி கோவிலில், மாசி மகம்திருவிழா நடந்தது.

திருவிழாவை முன்னிட்டு, நேற்று பகல், 1:00 மணிக்கு, பில்லி சோறு எறியும் நிகழ்ச்சி நடந்தது. சுவாமியிடம் வேண்டுதல் வைத்த ஒருவர், தொடையை கீறி, அதிலிருந்து வழிந்த ரத்தத்தை, சோற்றில் கலந்து, பிசைந்து, உருண்டையாக உருட்டினார். முன்னதாக, வேண்டுதல் வைத்தவரின் மகன், வேட்டிகளால் அமைத்த குடிலில், அமரவைக்கப்பட்டான். பின், கோவில் பூசாரிகள், அந்த சோற்று உருண்டையை ஏந்தியபடி, காட்டு பகுதிக்குள் ஓடினர். காட்டுக்குள் சென்ற அவர்கள், சோற்று உருண்டைகளை, வானத்தை நோக்கி வீசி, திரும்பிப்பார்க்காமல் கோவிலுக்கு வந்தனர். வேட்டியால் அமைத்த குடிலில் அமர வைக்கப்பட்ட சிறுவன் வெளியே வந்து, சுவாமியிடம் வழிபாடு நடத்தினான். வானத்தை நோக்கி வீசப்படும் சோற்று உருண்டைகளை, சுவாமி ஏற்றுக் கொள்வதால், கீழே விழாது என்பது நம்பிக்கை. இந்த விழாவில், ஆயிரக்கணக்கான பக்தர்கள் கலந்து கொண்டனர். இன்று காலை, வைரத்தேர் திருவிழா நடக்கிறது.