காரைக்கால்: திருநள்ளாறு சனீஸ்வரர் கோவில் கும்பாபிஷேகத்தை தொடர்ந்து நடந்து வந்த மண்டலாபிஷேகம் நிறைவு விழா நேற்று நடந்தது. சனி பரிகார ஸ்தலமான திருநள்ளாறு சனீஸ்வரர் கோவில் கும்பாபிஷேகம் கடந்த பிப். 11ம் தேதி நடந்தது. அதனை தொடர்ந்து மண்டல பூஜை நடைபெற்று வந்தது. அதன் நிறைவு பூஜை நேற்று நடந்தது.இதற்கான பூஜை நேற்று முன்தினம் துவங்கி விக்னேஸ்வர பூஜை. கணபதி ஹோமம். விசஷே கும்ப பூஜைகள் நடைபெற்றது.

நேற்று காலை சிறப்பு பூஜைகளுடன் யாகசாலை முடிந்து சிவாச்சாரியார்கள் கலசங்களுடன் கோவில் உட்பிரகாரத்தை வலம் வந்து, தர்பாரண்யேஸ்வரர். சொர்ண கணபதி. பிரணாம்பிகை. முருகன் சனீஸ்வர பகவான் ஆகியோருக்கு சிறப்பு அபிஷேகம் மற்றும் தீபாராதனை நடந்தது.விழாவில் கலெக்டர் விக்ரந்தராஜா, கோவில் நிர்வாக அதிகாரி சுந்தர். தருமபுர ஆதீன கட்டளை விசாரணை கந்தசாமி தம்பிரான் சுவாமிகள் உள்ளிட்ட பலர் கலந்து கொண்டனர்.