கள்ளக்குறிச்சி: கள்ளக்குறிச்சி அடுத்த நீலமங்கலம் செம்பொற்ஜோதிநாதர் கோவிலில் பிரதோஷ வழிபாட்டையொட்டி சிறப்பு அபிஷேகம் மற்றும் பூஜை நடந்தது.
இதேபோல் கள்ளக்குறிச்சி சிதம்பரேஸ்வரர், நீலமங்கலம், கமலா நேரு தெரு ஏகாம்பரேஸ்வரர், ஏமப்பேர் விஸ்வநாதர், சோமண்டார்குடி சோமநாதீஸ்வரர், முடியனுார், தென்கீரனுார் அருணாசலேஸ்வரர், தண்டலை சுயம்பு நாதேஸ்வரர், கனங்கூர் ராமநாதீஸ்வரர், வரஞ்சரம் பசுபதீஸ்வரர், சடையம்பட்டு கேதாரீஸ்வரர், வடக்கநந்தல் உமாமகேஸ்வரர், ஆலத்துார் திருவாலீஸ்வரர் கோவில்களிலும் பிரதோஷ வழிபாடு தேவாரம், திருவாசகம் பாடி பூஜை நடந்தது.

கண்டாச்சிபுரம்: கண்டாச்சிபுரம் ராமாநாதீஸ்வரர் கோவிலில், நேற்று மாலை 5:30 மணி முதல் பிரகார மூர்த்தி சுவாமிகளுக்கு அபிஷேக ஆராதனை நடந்தது. தொடர்ந்து ராமநாதீஸ்வரருக்கும், நந்தித் தேவருக்கும் சிறப்பு தீபாரதனை நடந்தது.

மயிலம்: செண்டூர் சிவன் கோவிலில் நேற்று பிரதோஷத்தை முன்னிட்டு மாலை 5:00 மணிக்கு மூலவருக்கு பால், சந்தனம் உள்ளிட்டவைகளால் சிறப்பு அபிஷேகம் நடந்தது. கோவில் வளாகத்தில் உள்ள நந்திக்கு நடந்த மகா தீபாராதனை வழிபாட்டில் ஏராளமான பக்தர்கள் கலந்து கொண்டு சுவாமி தரிசனம் செய்தனர். இதேபோன்று, திருவக்கரை சந்திர மவுலீஸ்வரர் கோவிலில் சிறப்பு பூஜை நடந்தது.

சின்னசேலம்: தென்பொன்பரப்பி சொர்ணபுரீஸ்வரர் கோவிலில் பிரதோஷ வழிபாட்டையொட்டி மூலவருக்கு சிறப்பு அலங்காரம், நந்தீஸ்வரருக்கு அபிஷேகம் மற்றும் மகா தீபாராதனை நடந்தது. சின்னசேலம் கங்காதீஸ்வரர், ராயர்பாளையம் குமாரதேவர் மடம் பழமலைநாதர், கூகையூர் பெரியநாயகி உடனுறை சொர்ணபுரீஸ்வரர், அசலகுசலாம்பிகை சமேத பஞ்சாட்சரநாதர் கோவில்களிலும் பிரதோஷ வழிபாடு நடந்தது.

சங்கராபுரம்: தேவபாண்டலம் சிவன் கோவிலில் நேற்று மாலை பிரதோஷ வழிபாட்டு மன்ற தலைவர் நாட்டார் ராமலிங்கம் தலைமையில் ரவி குருக்கள், கணபதி முன்னிலையில் பிரதோஷ நாயகருக்கு பால்,தயிர், இளநீர், பஞ்சாமிர்தம் உள்ளிட்ட வாசனாதி திரவியங்களால் சிறப்பு அபிஷேக ஆராதனை நடந்தது. இதே போல் சங்கராபுரம் முதல்பாலமேடு ஏகாம்பரேஸ்வரர் கோவில், அ.பாண்டலம் புதிதாக கட்டப்பட்ட சிவன் கோவில், மஞ்சபுத்துார் கைலாசநாதர் கோவில், முக்கனுார் தாண்டுவனேஸ்வரர் கோவில், புதுபட்டு சொர்ணபுரிஸ்வரர் கோவில், தியாகராஜபுரம் சிவன் கோவில்களில் பிரதோஷ வழிபாடு நடந்தது.