பொள்ளாச்சி: பொள்ளாச்சி மாரியம்மன் கோவில் மூன்றாம் நாள் தேரோட்டம் நேற்று நடந்தது. தேர் சக்கரத்துக்கு உப்பு, மிளகு கொட்டி பக்தர்கள் வழிபாடு செய்தனர்.

பொள்ளாச்சி மாரியம்மன் கோவில் தேர்த்திருவிழா கடந்த மாதம், 11ம் தேதி நோன்பு சாட்டுதல் நிகழ்ச்சியுடன் துவங்கியது. விழாவின் முக்கிய நிகழ்வான தேரோட்டம் கடந்த, 4ம் தேதி துவங்கியது; 12 அடி உயரமுள்ள மரத்தேரில் விநாயகரும்; 21 அடி உயரமுள்ள வெள்ளித் தேரில் மாரியம்மனும் எழுந்தருளி பக்தர்களுக்கு அருள்பாலித்தனர்.கோவிலில் இருந்து, மார்க்கெட் வீதி வழியாக வந்து வெங்கட்ரமணன் வீதியில் தேர் முதல் நிலை நிறுத்தப்பட்டது. வெங்கட்ரமணன் வீதியில் இருந்து புறப்பட்டு, சத்திரம் வீதியில் இரண்டாம் நிலை நிறுத்தப்பட்டது. தேரின் சக்கரத்தில், உப்பு, மிளகு கொட்டி, பக்தர்கள் நேர்த்தி கடன் செலுத்தினர். பக்தர்கள் வரிசையில் நின்று தரிசனம் செய்தனர். அன்னதானம் வழங்கப்பட்டது. நேற்று இரவு, மூன்றாம் நாள் தேரோட்டாம் நிறைவு பெற்றதும், கோவில் வளாகத்தில் தேர் நிலை நிறுத்தப்பட்டது.