விருத்தாசலம்: விருத்தாசலம் விருத்தகிரீஸ்வரர் கோவில் மாசிமக பிரம்மோற்சவ தெப்பல் உற்சவத்தில், சுப்ரமணியர் சுவாமி தெப்பத்தில் உலா வந்து அருள்பாலித்தார்.

விருத்தாசலம் விருத்தாம்பிகை, பாலாம்பிகை உடனுறை விருத்தகிரீஸ்வரர் கோவிலில், மாசிமக பிரம்மோற்சவம் கடந்த 28ம் தேதி கொடியேற்றத்துடன் துவங்கியது. தினசரி ஆழத்து விநாயகர், சுப்ரமணியர் சுவாமி, அம்பாள், சண்முக சுப்ரமணியர் உள்ளிட்ட பஞ்சமூர்த்திகளுக்கு சிறப்பு அபிேஷக ஆராதனை, அலங்கரித்த வாகனங்களில் வீதியுலா நடக்கிறது.முக்கிய நிகழ்வாக, நேற்று அம்மன் குளத்தில் தெப்பல் உற்சவம் நடந்தது. இதையொட்டி, சுப்ரமணியர் சுவாமி சமேத கோலத்தில் புஷ்ப பல்லக்கில் அலங்கரித்து, எட்டுமாட வீதிகளில் உலா வரும் நிகழ்ச்சி நடந்தது. அதிகாலை 3:20 மணிக்கு அம்மன் குளத்திற்கு வந்த சுப்ரமணியர் சுவாமி, சிறப்பு பூஜையுடன் தெப்பத்தில் மூன்றுமுறை உலா வந்து, அருள்பாலித்தார்.சப் கலெக்டர் பிரவீன்குமார், கூடுதல் சார்பு நீதிபதி மகாலட்சுமி, டி.எஸ்.பி., இளங்கோவன், நகராட்சி கமிஷனர் (பொறுப்பு) பாண்டு, செயல் அலுவலர் முத்துராஜா உள்ளிட்ட அதிகாரிகள், பொது மக்கள் ஆயிரக்கணக்கானோர் பங்கேற்றனர். இன்று சண்டிகேஸ்வரர் உற்சவத்துடன் மாசிமக விழா நிறைவு பெறுகிறது.