குன்னூர்: கொரோனா தொற்று பரவாமல் இருக்கவும், அனைவரும் நலம் பெறவும் குன்னூர் அருகே தோடரின் ஆதிவாசி மக்கள் பிரார்த்தனை, வழிபாடுகள் நடத்தி வருகின்றனர்.

நீலகிரி மாவட்டம் ஆதிவாசி மக்களான தோடர் இன மக்கள் ஊட்டி, குன்னூர், கோத்தகிரி உள்ளிட்ட சுற்றுப்புற பகுதிகளில் மந்து எனப்படும், கிராமங்களில் வசித்து வருகின்றனர். இந்நிலையில், குன்னூர் அருகே நெடிமந்து ஆதிவாசி கிராமத்தில், தோடர் இன மக்கள், தங்களது பாரம்பரிய கோவில்களில், நீலகிரி உட்பட அனைத்து பகுதிகளிலும் கொரோனா பாதிப்பு இல்லாமல் இருக்கவும், அனைவரும் நலம் பெறவும் பிரார்த்தனை, வழிபாடுகளை நடத்தி வருகின்றனர். இது தொடர்பாக கிராமத்தை சேர்ந்த தேனீர்குட்டன் கூறுகையில், "உலகம் முழுவதும் வைரஸ் தொற்று காரணமாக மக்கள் மிகுந்த பாதிப்புக்கு உள்ளாகியுள்ள நிலையில் கொரோனா பாதிப்பில் இருந்து, மீண்டு வரவும் உலக மக்கள் அனைவரும் நலம் பெறவும் பாரம்பரிய முறைப்படி வழிபாடு மற்றும் பிரார்த்தனைகளை நடத்தி வருகிறோம் என்றார்.