மானாமதுரை: மானாமதுரையில் எல்லை தெய்வமான எல்லைப்பிடாரி அம்மன் கோயில் சித்திரைத் திருவிழா கொடியேற்றத்துடன் துவங்கியது.

சிவகங்கை சமஸ்தானம், தேவஸ்தானத்திற்குட்பட்ட ஆனந்தவல்லி- சோமநாதர் கோயில் சித்திரை திருவிழா நடைபெறுவதற்கு முன்பாக எல்லை தெய்வமான எல்லைப்பிடாரி அம்மன் கோயிலில் சித்திரை திருவிழா நடைபெறுவது வழக்கம்.இந்நிலையில் கடந்த இரண்டு வருடங்களாக கொரோனா காரணமாக சித்திரை திருவிழா நடைபெறாத நிலையில் இந்தாண்டு சித்திரை திருவிழா நடை பெறுவதற்கு அரசு அனுமதி அளித்ததை தொடர்ந்து எல்லைப்பிடாரி அம்மன் கோயில் சித்திரை திருவிழா நேற்று இரவு கொடியேற்றத்துடன் துவங்கியது. உற்சவர் எல்லைப்பிடாரி அம்மன் சிம்ம வாகனத்தில் சர்வ அலங்காரங்களுடன் கோயிலுக்கு முன் எழுந்தருளினார்.இதனைத் தொடர்ந்து கொடிமரத்தில் கொடியேற்றம் நடைபெற்றது.பின்னர் சிறப்பு தீபாராதனைகள் நடைபெற்றன.விழாவின் முக்கிய நிகழ்ச்சியான பொங்கல் மற்றும் மாவிளக்கு பூஜை விழா வருகிற 29ம் தேதி நடைபெற உள்ளது.விழா நாட்களில் போது தினந்தோறும் உற்சவர் எல்லைப்பிடாரி அம்மன் ஆனந்தவல்லி அம்மன் கோயிலிலிருந்து எல்லைப்பிடாரியம்மன் கோவில் வரை வீதி உலா நடைபெறும்.இந்த விழா முடிவடைந்தவுடன் மானாமதுரை ஆனந்தவல்லி அம்மன் கோயிலில் சித்திரைத் திருவிழா துவங்கப்பட உள்ளது. விழாவிற்கான ஏற்பாடுகளை தேவஸ்தானம் மற்றும் நிர்வாகத்தினர் செய்து வருகின்றனர்.