ஸ்ரீவில்லிபுத்தூர்: ஸ்ரீவில்லிபுத்தூர் ஆண்டாள் கோயில் பிரசாத ஸ்டால் ரூபாய் 21 லட்சத்திற்கும், திருவண்ணாமலை சீனிவாச பெருமாள் கோவில் பிரசாத ஸ்டால் 13.90 லட்சத்திற்கும் ஏலம் எடுக்கப்பட்டுள்ளது.

ஸ்ரீவில்லிபுத்தூர் ஆண்டாள் கோயில் மற்றும் திருவண்ணாமலை சீனிவாச பெருமாள் கோயில்களில் இயங்கும் பிரசாத ஸ்டால்கள், வாகன பார்க்கிங் கட்டணம் வசூல், பூக்கடைகள், தோப்புகளில் உள்ள மரங்களின் மகசூல் எடுப்பது உட்பட பல்வேறு இனங்களுக்கான ஏலம், அறநிலையத்துறை துணை ஆணையர் கணேசன், செயல் அலுவலர் முத்துராஜா மற்றும் அறநிலையத் துறை அலுவலர்கள் முன்னிலையில் ஆண்டாள் கோயிலில் நடந்தது. இதில் ஆண்டாள் கோயிலுக்கு வரும் வாகனங்களுக்கு பார்க்கிங் கட்டணம் வசூலிக்கும் உரிமை ரூ. 16.10 லட்சத்திற்கும், பூக்கடைகள் ரூ 6.50 லட்சத்திற்கும், பிரசாத ஸ்டால் ரூ.21 லட்சத்து 49 ஆயிரத்திற்கும், திருவண்ணாமலை சீனிவாச பெருமாள் கோயிலில் பிரசாத ஸ்டால் ரூ. 13 லட்சத்து 90 ஆயிரத்திற்கும் ஏலம் எடுக்கப்பட்டுள்ளது. கடந்த இரண்டு வருடங்களாக கொரோனோ காரணமாக பக்தர்கள் வருகை குறைந்திருந்த நிலையில், தற்போது இயல்பு வாழ்க்கை துவங்கியுள்ளதால் கோயிலுக்கு உள்ளூர் மட்டுமின்றி வெளி மாநில பக்தர்களும் அதிகளவில் வரத் துவங்கியுள்ளநிலையில் பிரசாத ஸ்டால்கள் மிகவும் அதிக தொகைக்கு ஏலம் போயுள்ளது, ஆண்டாள் கோவில் நிர்வாகத்திற்கு கூடுதல் வருவாயை ஏற்படுத்தியுள்ளது.